《閨蜜睡房》：鍾舒漫烏龍女校生 漏M(火羅)爆
歌手鍾舒漫在東網巨星《閨蜜睡房》新一集節目中，大談16歲卜卜脆的初戀經歷，她在朋友介紹下認識跳街舞的初戀對象，自言要低B及無聊才符合其擇偶條件，還大爆入行後試過生理期發生「漏M」的(火羅)事。
鍾舒漫（Sherman）以粉紅色萌爆睡衣Look亮相東網巨星全新節目「海馬牌床褥特約」《閨蜜睡房》，在中學時讀女校的她，笑言大部分時間都很專心讀書，未有想過拍拖，認為沒有男生的學校生活也沒有所謂，還以「很爽」去形容：「做乜都可以粗魯少少，大家都唔會好注重儀態，例如擘大腳坐都冇所謂。」
男友要過妹妹關
Sherman稱直到16歲才開始懂得化妝及打扮，也想結識異性，雖然有對家男校，但她卻無膽去識，只敢遠望，後來經朋友介紹，才識到初戀對象，她說：「初戀係16歲，當時香港興起跳舞文化，尖沙咀會有好多人圍圈跳舞，覺得嗰班人係型人代表，我成日去望佢哋跳舞，就係咁識咗。」提到讀書生活的難忘事，她笑言免不了在生理期發生尷尬情況：「漏M係唔少得，但我入行之後，廿幾歲都試過一次，真係覺得好慘，可能當時太過匆忙，但嗰次之後我就安全到不得了。」
眾所周知，Sherman與胞妹鍾舒祺感情要好，她坦言兩人的感情狀況對方最清楚，拍拖更會即時帶男友給妹妹過目：「佢成日都話我男友最緊要係同佢溝通到，如果溝通唔到，就唔使旨意一齊。（有冇試過溝通唔到？）咁So far都溝通到。」至於擇偶條件，感覺又型又酷的Sherman竟稱首要是低B及無聊：「其實我有9成係鍾意低B同無聊嘢，成日好想搵到啲明白我個腦諗乜嘅人，我講完啲無聊嘢，佢可以接落去。（外表？）唔係最重要，當然最好識音樂。（單身咗一段日子，依家恨唔恨拍拖？）未有心話要快啲搵個男友，今年嘅目標係事業上再衝刺，我唔擔保下年會唔會想拍拖。（上一段感情有冇被傷到？）過咗去，當時點都會有，但過咗好耐。」
幫父母改花名
Sherman又自爆會幫家中所有公仔改名，甚至連父母也不放過：「我阿媽叫冬瓜，阿爸叫阿Dee。」她還向大家介紹晚晚跟她同床的攬枕Mimi：「我每晚都要夾住佢瞓，同埋睇電話，有時臨瞓前睇咗自己鍾意嘅唱歌片，我會愈睇愈亢奮，仲會開聲唱歌添！」想知更多Sherman的床上癖好？就要收睇《閨蜜睡房》啦！
文：名人組