現年18歲的美國小鮮肉男模Lucky Blue Smith昨日在社交網Instagram上載與26歲前青春小姐女友Stormi Bree的甜蜜黑白合照，宣布搞大女友個肚，令不少妹妹仔粉絲心碎。他留言：「我希望同大家分享我人生重要嘅部分，我有個好正同驚喜嘅消息要宣布，Stormi同我有咗BB！見到自己嘅人生一直受到祝福真係好瘋狂，我真係好開心同好期待去經歷呢個旅程！」他「報喜」不久，便與女友Stormi出席雜誌在巴黎時裝周舉辦的晚宴，Stormi穿上單薄的喱士裙並以外套遮肚。
而不少Lucky仔的女粉絲對「喜訊」大感震驚，紛紛留言話心碎，亦有網民批評Lucky太後生做老竇，連咩叫「責任」都未知：「我個仔18歲，如果佢帶一個26歲女人仲要搞大佢個肚，我一定嬲爆！仲有後生嘅人認為有BB係好浪漫嘅事，事實照顧BB係一件困難嘅事！」
查實於2015年來港宣傳的Lucky仔接受本報專訪時，曾表明將最寶貴嘅「第一次」留畀未來老婆，當時他坦承從未拍拖，亦講明不會婚前性行為：「呢啲嘢唔可以亂畀人！」想不到事隔兩年，未婚的他已快將做老竇，難怪令人覺得「假正經」！
Lucky仔10歲時被星探發掘加入模特兒界，曾為各大時裝品牌行騷，成為當今男模界搶手貨，他亦與三名模特兒姊姊合組搖滾組合The Atomics，他負責打鼓。至於Stormi 2009年當選美國青春小姐冠軍而入行，是模特兒、歌手亦是演員。去年Lucky仔接受雜誌《ES》訪問首次透露與Stormi拍拖，早前二人亦拖手一同在米蘭時裝周行騷。
文：外娛組