田蕊妮拍被姦戲癲到「爆缸」

田蕊妮、吳業坤、賴慰玲、曾航生、簡淑兒和何啟南等劇集《迷》演員昨日在坑口宣傳。田蕊妮獲觀眾激讚演技神級，「計穎妍」一角奸到令觀眾心寒，對此她笑說：「有啲人話驚過睇鬼古，角色係入行以嚟最難處理，拍嗰陣擔心觀眾會驚咗我，希望大家唔好咁入戲，之後啲劇情仲令人心寒，朋友話我有潛質做變態殺手。（再攞視后？）冇諗呢啲，最有滿足感係有啲一向唔太喜歡阿田，都覺得我OK。（老公杜汶澤有冇心寒？）我哋一齊睇，見佢睇到眼都凸埋，成個人硬晒，連我隻貓聽到我鬧人都緊張起嚟。」

簡淑兒出入坐巴士

由於劇情與《致命復活》相似，被封為「女版郭晉安」的阿田原來亦有向對方求助，她說：「嗰陣壓力好大，唔知點發洩、點表達，好辛苦，搵咗郭晉安分享，佢叫我唔好咁入，要睇住自己，但我冇聽佢講，哈哈。」講到幾乎被何啟南強姦的戲份，阿田說：「嗰陣陷入瘋狂狀態，場戲要攞鐵罐扑屈Dee哥（何啟南）個頭，手指爆缸都唔知，以為扑穿咗佢個頭，最後入院縫咗兩針。」

田蕊妮在劇中險被何啟南強姦。	何啟南	田蕊妮與劇中女兒簡淑兒大玩夾波波遊戲，表情肉緊。

簡淑兒近日再被指整容，她說：「攞番人生最核突嘅相同依家比較，對比一定大，講乜都冇用，已經澄清過。（純天然？）係呀。（效法Angelababy搵醫生證明﹖）冇用，Baby驗完都畀人講，唔通下次生痔瘡又去驗咩。 」她又否認是富家女，指屋企只是做珠寶小生意，自言出入也沒有司機，只是坐巴士。

田蕊妮搞笑坐上簡淑兒大髀。

吳業坤與賴慰玲玩得投入。

坤坤自認大……Pat

吳業坤則劇透角色會死掉：「報道都出晒，套戲有唔少動作場口，仲第一次吊威吔。（男人最痛？）我比較大……個pat pat，所以吊住墜力比較大，有人叫我着多條底褲，但我只着一條，都係好體驗。（吊完威吔可有瘀傷？）冇睇，但有少少『梗』住。」將再婚的「屈Dee」何啟南指與女友商量過不會擺酒，打算簡單旅行結婚，不介意好友吳啟華提議同行遊玩。講到強姦阿田的戲份，他笑說：「又強姦唔到，又畀佢走甩。」

文：影視組