栢芝不滿被針對嗌收手

近期不少負面新聞指向張栢芝,昨日「三八婦女節」栢芝又收到「土豪」大禮,令素來低調不回應的栢芝也決定要發聲!對於大量失實指控,究竟是否有人操控?令栢芝感到疑惑,只想過平靜生活的她向「有心人」高呼:「邊個Party送我大禮都好,希望下年唔好再送,我個仔(Lucas)送咗條藍手鏈畀我,我收呢份得o架喇!其他唔使客氣!」除了栢芝外,於昨日婦女節發聲的還有劉嘉玲與陳雅倫,她們都各有心聲!

張栢芝多年來都與「是非」兩字扯上關係,即使如普通人一樣行街Shopping、剪髮扮靚,都會被醜化,昨日更有指她揸靚車是「土豪」,又話她跟髮型屋職員狂噴口水,在「三八婦女節」收到如此「禮物」,一向對負面新聞都會保持緘默的她,決定發聲還擊,她接受電話專訪時,不慍不火地先對負面新聞逐一回應:「話我去髮型屋同職員噴口水,其實咁多年畀網絡世界已經調整得樂觀咗,好多嘢冇乜所謂,但係髮型屋嘅職員其實係陪住我出埠工作嘅團隊人員,大家已經係朋友嚟,我唔想我朋友嘅媽咪見到個女話畀個明星用口水噴,我作為媽咪,會明白係好心痛嘅事,普通傾偈寫成咁,對我團隊嘅人唔係咁公平。」

揸靚車唔係「土豪」

對於揸靚車被指「土豪」,栢芝則說:「其實我覺得人與人之間係平等嘅,唔應該用『土豪』字眼去形容任何人,我喜歡車,揸架好啲嘅車唔係乜嘢新奇嘅事,唔明點解今日就要用『土豪』嚟形容,同埋唔明焦點成日放喺我度,會唔會唔係咁公平?係咪故意針對呢?其實今日我有少少愕然,點解有我嘅負面消息嘅同時,又有一啲唱好某位男士嘅消息出現呢?我唔會開名,唔想畀人攻擊,自找麻煩,但點解人哋屋企揸架車五百幾萬,就冇人話『土豪』?其實點都好,可唔可以唔好提我個名,究竟係媒體針對,定係某啲人(針對),我都仲懷疑緊,唔知究竟係乜嘢事。」

栢芝直言對針對自己的「負聞」一向都保持沉默,但覺得「三八婦女節」,女人應開心收禮物,而不是收「負面新聞」作禮物,所以決定發聲:「其實咁多年我都已經懂得自我安慰、睇化咗,唔知邊個Party送畀我嘅大禮都好,個禮實在有啲大,下年可唔可以唔好送畀我,今日我同大仔(Lucas)去學校嘅野外旅行,佢送咗條藍手鏈畀我,我只接受囝囝呢份禮物,其他嘅,真係唔使客氣!」

避談霆鋒賺過億

昨日有指謝霆鋒做生意賺過億,栢芝對此說:「唔好講話我兩個仔個老竇,其實邊個人好、邊個人唔好都唔關我事,我只希望針對住我、想令我唔開心嘅人,可唔可以好似電腦撳掣咁,將我Delete咗佢,大家唔係咁Friendo架咋,我都幾忙吓,可唔可以當見我唔到呢!」

栢芝一再強調現在只想開開心心地過生活,現在心靈很富足:「其實心靈富足比金錢富有重要得多,我依家心入面嘅銀行係非常夠使o架!哈哈!依家只想日日開開心心咁去過,唔想同心地唔好嘅人有任何接觸,寧靜咁過生活。」

文:影視組

第一手消息請下載on.cc東網iPhone/iPad/Android/