呂晶晶 黎美言睇星座搵Mr.Right

講扮靚停唔到口

成為「星韜小花」的Winkie及呂晶晶均覺得公司warm到似大家庭，兩女私底下有說不完的扮靚話題，訪問當日當然不例外。

黎：黎美言、呂：呂晶晶

黎：係咪潮流興減肥？唔好講我哋做幕前，好多男女仔坐埋食飯嘅話題都離不開「你最近瘦咗喎」、「你肥咗喎」！修身最緊要健康，同埋我覺得係一生人嘅革命，食得清啲、飲食有節制，會影響自己做事。Artist界有一日green monday係環保嘅，嗰日會食多啲菜，自己身體好之外，都係保護地球。呢樣我覺得好嘅，會分享畀你，而你又會分享畀身邊朋友，係一個互相嘅好影響。

呂：我哋時不時交換運動心得，但仲未有機會一齊去做過。你之前就忙打拳比賽，我最近拍咗套電視劇需要我打泰拳，學識咗之後就愛上咗。

Winkie和呂晶晶都有研究星座，更會靠星座來了解男士。	Winkie笑言減肥是終身目標，但會適可而止，最緊要健康。	呂晶晶早前演打女角色，特別跟冼灝英師傅學拳。

愛山羊座夠專一

基本上girls talk都離不開美容、瘦身等扮靚話題，想不到原來做運動都能與星座扯上關係，兩女愈講愈興奮，教大家如何以星座了解男生。

Winkie於格鬥真人騷打到飛起，雖然周身傷，但無損她學拳決心。

呂晶晶和Winkie讚老闆諸葛紫岐（中）照顧下屬，經常搞聚會聯誼。

呂：做運動會分泌正能量嘅賀爾蒙，特別對我呢啲易受情緒影響嘅星座——巨蟹座有用。我會莫名其妙地失望，突然諗埋負面嘢，令自己好傷心。做運動令我正面，大家都話我瘦咗，上鏡靚咗，自己心情都好好多。

黎：其實我以前唔係好信星座，入咗行之後身邊多朋友討論，自己又有八卦去聽。我係天秤座，性格都幾天秤座嘅，好公義、公正、貪靚、鍾意藝術嘢，例如畫畫、跳舞。通常人只係對自己星座比較熟悉，有時聽吓其他人講星座，好似你咁，就會知道原來巨蟹座係多愁善感，哈哈！

呂：巨蟹座好顧家o架，可以匿埋喺屋企幾日唔出街，有時鍾意一個人好似隻蟹咁保護自己。

黎：有時啱啱認識一個新朋友，星座可以令你知道對方性格大約係咁，相處亦會識互相遷就，所以星座都幾好玩。

呂：我有研究月亮星座、上升星座同太陽星座，三個拼埋睇到個人係點，都幾準o架！

黎：你好迷信？

呂：唔係，係科學研究出嚟，哈哈！

黎：都係呀，有時識男仔會睇佢係咩星座先，估吓佢會唔會好花心或者係點，都有少少根據o架！

呂：同埋都係一個話題，大家一齊研究，可能十個point有四個中，大家都會傾得開心。

黎：我覺得同我最夾嘅男仔係山羊座，之前拍拖嘅男朋友好多都係山羊座。山羊座嘅男仔通常唔想從頭嚟過，譬如同你拍咗拖，佢唔想重新去追其他女仔，我都幾鍾意，畀人感覺好stable，比較長情，咁拍拖都係為求長久嘛！

呂：個個女仔都怕遇到花心男，唔鍾意遇到，但呢啲好難講，女仔又鍾意人口花花氹自己，但又唔鍾意佢對其他女仔口花花，哈哈！

黎：我唔使喇，細個時會覺得幾開心，但當大個咗就覺得好似紙咁薄，冇安全感。

揀男友着重孝心

談到擇偶條件，Winkie及晶晶同樣認為溝通和愛屋及烏最為重要，更大嘆很難遇到Mr. Right。

呂：用時間觀察耐啲，先考慮要唔要開始。我嘅擇偶條件係要心地善良，對我屋企人好，要孝順，大家思想要接近。有時朋友介紹男仔我識，都會傾偈了解吓先，唔係好似以前一見到靚仔就話OK。人大咗反而慢熱咗，要睇吓傾唔傾到偈，真係有啲男仔唔係同一個channel裏面。依家有追求者，但唔適合自己。

黎：搵啱對象真係好難！唔可以要求太高，但唔可以冇要求。自己鍾意嗰type總係遇唔到。冇諗過嗰個總會喺你身邊默默支持你、去追你。所以到最後我嘅擇偶條件係佢愛你家庭，愛屋及烏，正如你所講溝通到已經好OK。始終我覺得激情只有頭幾個月，之後就係細水長流，我希望35歲前結婚，因為想生BB。

呂：我又係，我好鍾意小朋友，但係呢啲冇得強求。

黎：係，都係嗰句你愈諗就愈難，反而放鬆啲，個對象就自然會出現。

呂：做呢行好似識好多人，但其實個圈子好窄，識嚟識去都係嗰啲人，想跨出去識其他行業嘅人係好難。

黎：對方需要好懂得體諒做我哋呢行囉，唔可以好似正常情侶好高調咁出街，因為我哋仲要工作，唔係結咗婚就算。我係事業心重嘅女性，就算結咗婚都會繼續工作，另一半一定要好體諒呢行，如果佢覺得麻煩，可能佢唔啱你或者唔夠愛你。

呂：反而我可以放棄，雖然我好鍾意拍戲，堅持到呢一刻都係因為夢想。但若果將來老公或佢屋企人唔鍾意，為咗家庭，我可以捨棄。

後記：新公司似溫暖家庭

Winkie及呂晶晶坦言加盟Marie旗下後比以前開心，她們透露老闆諸葛紫岐經常舉行聚會，與公司員工聯誼，感覺似溫暖家庭。晶晶憶述早前公司為她舉行生日派對，獲Winkie送上一份窩心禮物。晶晶說：「Winkie知道我鍾意長耳環，生日送咗畀我，出event或者影相我都會戴，我好鍾意呢份禮物。」

文：專案組

黎美言化妝及髮型：Qetsiyah Lam@MAKE UP FOR EVER ACADEMY HONG KONG

呂晶晶髮型：Thomas@Hair Corner

服裝：Snidel

場地：Hooray Bar and Restaurant