連詩雅撐德國門神紐亞夠堅！

球壇盛事2016歐洲國家盃準決賽第二場，將在本港時間周五凌晨三時舉行，由法國對戰德國。兩隊實力均等，而且各有支持者。歌手連詩雅睇好德國隊晉級，更大讚球員實力強：「我係支持德國隊，德國共有八名球星來自班霸拜仁慕尼黑，包括天下第一鋼門紐亞，佢喺八強對意大利時救出兩個12碼，所以我覺得今場德國隊會踢贏法國隊。」熱愛足球的藝人洪天明亦力撐德國：「法國今年有主場之利，雖然應該睇高一線，但係我都會揀德國，經驗所談德國經常都入到決賽，贏在大賽經驗。」

蕊蕊睇好法國晉級

法國隊擁躉則有藝人蕊蕊，她會全力支持法國晉級：「法國今屆係主辦國，所以有主場嘅優勢，再加上天時地利人和，所以睇好佢入決賽！」蕊蕊更力撐法國隊新一代中場保羅普巴，希望他狀態大勇，帶領球隊殺入決賽：「之前佢表現唔係好理想，但上場入咗一球之後狀態返晒嚟，希望佢可以Keep到入決賽啦！」她又笑言自己有「私心」，最想法國及威爾斯在決賽碰頭：「自己最想係睇法國同威爾斯之爭，決賽我希望可以約埋成班朋友睇波，見證歷史一刻，感受吓呢個熱鬧氣氛！」

王宗堯預咗打到加時

至於忙於宣傳電影的藝人王宗堯，表示會抽空觀賞賽事，更力撐有主場之利的法國隊，他說：「法國隊係東道主，加上前鋒表現好好，其他球員嘅狀態都好Fit，仲以快打慢，成個策略好好。相反，德國隊嘅球員不在狀態，同埋佢哋只打穩陣波，所以法國隊贏面大啲。我估今場隨時要打到加時，射12碼先可以分出勝負。」

文：專案組