阿倫爆老竇燒銀紙：佢唔知嗰啲係錢！

阿倫昨日出席「賽馬會耆智園」的活動，身為「耆義旅程」榮譽大使的他為首個腦退化症課程主持啟動禮。去年徐小鳳出席有關腦退化症活動指阿倫經常忘記歌詞，提議他出任大使，阿倫聽畢即笑言：「唔需要太記嘅，我太多歌嘛。」他又笑說：「忘記歲數呢個搵我做大使就啱，而亂講嘢就搵黎明啱，因黎明個腦唔知諗乜。」

問阿倫有沒有接觸過腦退化的老人家？他稱父親當年有腦退化症：「佢試過喺屋企燒銀紙，我聽到工人喺廚房大聲叫，見阿爸將我哋畀佢啲錢捲埋燒咗一半，佢都唔知嗰啲係銀紙。（燒咗咩色銀紙？）大紙細紙都有，所以老人家要睇實o架！」

揸車四圍搵

阿倫坦言錢財身外物，父親更試過走失。他謂：「好彩之前畀一個寫咗名嘅牌佢，啲人先見到係譚詠麟爹哋，而老竇就同人講要返夜學，因為佢坐喺灣仔修頓嗰邊，佢細個時係喺灣仔書院讀書嘅。（唔見咗老竇你係咪好驚？）驚呀！我揸車兜咗幾個鐘都搵唔到佢，後尾咁啱有朋友經過見到我老竇就通知我哋去接番佢。」

另外，陳百祥（阿叻）代表香港出席本屆巴西奧運任火炬手被指欠代表性，阿倫對此表示：「流住TVB嘅血都唔夠咩？唔係啩？（佢係香港唯一代表？）咁我唔知呀，佢係咪去做奧運前啲準備工夫，因利乘便啦，順理成章啱嘅。（你去巴西睇奧運？）今年唔得有嘢做。（怕當地危險？）小頭症呀？阿叻就唔怕，佢個頭咁大個。」

文：音樂組