曹穎惠懷孖胎 停工湊BB
「毛紡大王」曹光彪孫女曹穎惠（Veronica）2012年下嫁俄羅斯金礦大亨，兩人一直十分喜歡小朋友，Veronica造人成功，開心得與眾分享，據知她懷的是孖胎，小生命將於月尾誕生，Veronica一眾好友日前為她舉行baby shower慶祝派對，為照顧好BB，她還會暫停工作。
社交圈又有喜事，「毛紡大王」曹光彪孫女曹穎惠Veronica 2012年下嫁俄羅斯金礦大亨柯義（Evgeny Klyucharev），當時在西九文化區舉行婚宴，場地布置成俄羅斯堡壘，打造童話式婚禮，成為一時佳話。Veronica婚後繼續打理她的時裝生意，一方面亦努力造人，現懷有身孕的Veronica將於月底榮升媽咪，而且是懷有孖仔。日前其好友分別為她舉行了兩次baby shower，出席的有名媛邢嘉倩、李家彤、萬寶寶等，並將相片放上社交網站公諸同好，除了眾友人與Veronica合照，開心摸她的隆起的肚皮外，還有一張她與蛋糕的相片，蛋糕上有兩對BB腳仔，還寫上Anton & Lev，暗示Veronica懷孖胎。
預產期月尾
昨日Veronica接受電話訪問時故作神祕：「係咪孖胎唔講喇，到時就知，我今個月尾預產期，第一次做媽咪當然係非常非常非常開心，因為我做好晒準備，所以唔算太緊張。（肥咗幾多磅？）又唔係肥好多，我佗得好輕鬆，可能我一直有keep住做運動，有咗六個月後我仲有游水、做瑜伽。（生完BB會唔會繼續做嘢？）暫時唔諗工作住，我好好彩，今年初賣咗啲生意，就發現自己有咗，可以比較輕鬆啲。」
文：名人組