周麗淇爆裙避佘
鄭嘉穎與佘詩曼（阿佘）最近傳翻撻，前晚阿佘與嘉穎的另外兩位舊愛周麗淇（Niki）及徐靖雯齊集公開活動，Niki卻突然離場避過跟阿佘碰面，事後Niki否認刻意避佘，解釋離開只因為條裙爆扣，果然爆得着時。
藝人鄭嘉穎的三位舊愛周麗淇（Niki）、佘詩曼（阿佘）及徐靖雯（Jenny）前晚同場現身品牌活動。由於當年有傳因阿佘的介入導致Niki與嘉穎分手，兩女同場惹人關注。身穿短褲騷長腿的阿佘到場後約15分鐘，穿露肩裙的Niki出現，兩女相距不足50米。此時Niki突然走出場外，似要避開阿佘。直至阿佘離開時，經過Niki身後，Niki表情即略顯生硬。阿佘離開後，Niki才折返會場。
拒主動合照自認無辜
Niki矢口否認「避佘」：「我唔知今日有邊個嘉賓，亦唔知阿佘喺現場。」她以整理衣衫來解釋為何突然離開：「頭先影影吓相助手話我知件衫個扣針爆開咗怕走光，所以先出去整理，（你避阿佘？）冇，我唔會咁唔大方，同場冇所謂，我都好無辜，唔知大會安排。（覺得大會安排失當？）唔係，我冇問過流程同有乜嘉賓。（唔介意同阿佘合照？）合照我冇所謂，唔尷尬。」不過她拒絕主動跟阿佘合照：「依家咁刻意，如果頭先就冇所謂。」談到傳佘穎復合，Niki不願多談：「唔關我事，我冇乜嘢可以講。（祝福佢哋？）我唔知，怕答錯，任何人一齊都係開心事，總之人哋開心咪得囉！」
盛傳與嘉穎翻撻的阿佘全程表現風騷，問到與Niki同場會否尷尬？她笑說：「今日出嚟工作，大家都好開心。（唔介意同佢合照？）大家安排。」對於嘉穎回應翻撻傳聞時指要等待時機，問阿佘會否給對方時機？她笑言：「我冇聽過佢講，驗證咗先。（已經畀咗時機佢？）我一直都係單身。（攞到視后就畀個機會嘉穎？）全部都係你哋想像出嚟。（食回頭草？）愛情好微妙，如果兩個人開心，時機成熟喺埋一齊係開心事，唔應該用唔好嘅形容詞去形容。」
徐靖雯唔覺被擺上枱
另外，最遲現身的Jenny自嘲與嘉穎的緋聞是舊聞，又稱與Niki及阿佘同場不尷尬，問到會否覺得被擺上枱？她否認：「唔會，我哋都係好耐之前嘅事。（大會刻意安排？）唔覺。（傳佘穎復合？）對我嚟講係舊聞。（祝福佢哋？）邊個同邊個一齊都會祝福。」
文：名人組