Mandy Lieu處女下海拋性感
混血名模Mandy Lieu於前晚Hennessy派對中處女下海，首次以DJ身份打碟，穿上性感大露背裙，十分養眼，她謂自小就喜歡音樂，精於鋼琴和小提琴，笑言到長大後夠年齡到酒吧時就接觸電子音樂，但首次打碟依然感到很緊張，問會否喝點酒壯膽？她笑說：「梗係會啦，台下咁多人壯膽都要，今晚預咗搭的士，（你今日唔夠性感？）我後面大露背o架，我怕喺台上太high fing得太勁！」又笑言在台上高處可順便望靚仔。
同場還有盧巧音（Candy）與未婚夫兼樂隊Kolor成員蘇浩才，被問到婚禮籌備？Candy說：「已經影咗婚紗相，喺香港影，婚紗係銀灰色。（會唔會再去外地影？）唔會喇，或者等度蜜月先啦。」繼又謂婚禮將一切從簡，被笑指娶她好平？她說：「唔平o架，日後佢就知味道。婚後會繼續工作，生BB就隨緣。（有冇為結婚再加啲紋身？）就係因為結婚先停。（未婚夫有冇作首結婚曲？）佢有作咗首歌畀我唱，不過唔係為結婚，係為慈善。」
