鍾嘉欣玩跳車嚇窒王君馨
「無綫女神」王君馨和鍾嘉欣一動一靜，現實中卻是大倒轉！斯文的嘉欣笑言童年時最百厭，曾試過玩跳車，招致損手爛腳，嚇到君馨嗌黐線！而活潑好動的君馨，卻對日常生活細節一絲不苟，二人性格反差如此大，實在令人覺得新奇又有趣！
登台認識
王：Baby，你記唔記得我哋點認識？
鍾：我記得係內地頒獎禮，你話要 表演跳舞喺地下拉筋、一字馬，然後我同你講我一陣表演好緊張，你竟然話：「乜你都會緊張咩？」
王：當時大約係4年前，我望住你、陳豪、林峯、胡杏兒等，完全唔相信你哋會緊張。仲記得嗰陣你拎住個咪都會震吓震吓，覺得你好cute！
鍾：唔記得我哋當日傾咗啲乜，但你畀我嘅感覺係好正面、好真、好鬼妹仔，係一個可以交心嘅朋友。
懶理形象
王：之後我哋變得愈嚟愈熟，仲會去對方屋企！
鍾：其實，我好想學你屋企咁清潔！因為我份人唔係咁有組織，屋企啲嘢會亂咁放‥‥‥
王：但我好鍾意你咁樣，我去到你屋企，你係會戴眼鏡，夾晒啲頭髮，好真、好正！
鍾：反而有人過嚟你屋企，你就會着番靚少少，斯文同企理少少！而我就會着睡衣，襯T-shirt加埋啲好奇怪嘅衫！即使送貨嘅人嚟我屋企都照樣咁開門！
王：（大笑）咁佢哋有冇問你係咪鍾嘉欣小姐？
鍾：咁又冇喎！我唔知點解會唔諗呢樣嘢！有次我做facial仲好笑，個facial lady同我講：「通常啲藝人做facial都會好整齊，啲衫又會掛好，但點解你啲鞋會四圍擺？我諗你個人都幾真！」
王：其實我去你屋企，你咁求其，我反而好舒服，鍾意瞓喺度又得、趴喺度都得，笑又得、喊又得，唔使好正經咁同你食餐飯！
鍾：做朋友最緊要係搣甩塊面具，舒服係最緊要！
入行自閉
王：你記唔記得我哋試過傾偈傾到凌晨三點幾？
鍾：嗰次係傾童年往事，10歲嗰陣，我阿媽揸緊車，我就喺後面坐，因為好奇，我問佢：「如果開門嘅話，我飛出去會點？」
王：（難以想像）黐線o架！
鍾：因為我想試吓乜嘢感覺，所以我真係開門，結果飛咗出去，碌到成個身損晒，滿口都係沙同石！
王：咁你呢個經驗拍戲用咗未呀？
鍾：（大笑）未呀，哈哈！其實我都幾大膽呀！
王：你係呀！但你以前係咪唔會點同人講嘢？
鍾：我未入行就好多嘢講，入咗行我就變咗自閉，慢慢我就搵番自己出嚟！同埋對呢行熟悉咗，開始有番信心，冇以前諗咁多嘢，只要我做自己，唔使驚人哋接唔接受，因為我哋每一個個體都好特別！
王：其實學識喜歡自己嘅獨特係好難，好多人都鍾意同人比較。其實每一個人如果可以做自己，呢個世界會變得好靚，就好似一個花園咁，如果朵朵花都係一樣，咁咪好悶？反而啲花有大有小、有尖有肥，咁就最perfect！
鍾：咁你細個有冇發生瘋狂事？
王：我又冇你咁瘋狂，至少我冇飛車！我以前最曳都係去蒲，不過而家已經變得好乖啦！
後記：
訪問尾聲，嘉欣回想對君馨第一印象。有次在化妝間，君馨嘈到拆天，令嘉欣不禁「O嘴」：「嘈到難以置信，後來發現原來你同同屆港姐傾偈！」君馨聽完後，沒有生氣，反而大笑：「嗰陣我同張嘉兒同周美欣講英文！依家見到新一屆嘅港姐或華姐喺化妝間好嘈嘅時候，覺得好似我啱啱入行嘅時候，哈哈！」
鍾：鍾嘉欣
王：王君馨
文：文珊
攝：吳文聰
化妝：Henry Li
髮型：Venneth
服裝、場地：b+ab