Kelly返無綫做路人甲
無綫跟四大唱片破冰後，前晚為四大歌手搞音樂騷，相隔四年再現身無綫音樂節目的陳慧琳（Kelly），表示既陌生又熟悉，更笑言若曾志偉邀請她拍劇，會考慮做路人甲。李克勤則力證無綫沒有黑名單，並大讚無綫大方又公平。
無綫與四大破冰後，前晚為四大的歌手在電視城舉辦音樂節目《音樂在綫Mega Live》，環球歌手陳慧琳、李克勤、吳雨霏、關楚耀和樂隊Mr.，以及華納代表官恩娜、周柏豪和連詩雅等均有出席獻唱。Kelly表示已有四年沒亮相無綫音樂節目，問到感覺如何？她說：「好似好陌生，又好似好熟悉，就好似四年前我都未做阿媽。（之後會跟無綫合作？）會，我鍾意上遊戲節目，又成日贏，仲帶挈埋歌迷同家人有獎。」
李克勤想親密啲
Kelly透露稍後將任節目《決戰一分鐘》嘉賓，近日更練遊戲練到手瘀，但對於為無綫拍劇，她卻耍手擰頭表示冇得瞓，記者稱可談條件，Kelly謂：「應承咗到時都未必做到。（志偉搵你拍呢？）可以考慮，都係想做路人甲，可以快啲收工。」
無綫親生仔克勤，上月率先在《博愛歡樂傳萬家》獻唱，前晚他表示這證明無綫沒偏私：「唔同唱片公司得閒都可以上（節目），即係唔存在黑名單，大家邁向和諧。之前用『嗌交戀人』形容，今次變約會，睇幾時再走埋啲、親密啲。」克勤又指合約沒列明禁上其他台，但身為《決》主持的他不可做其他台的遊戲節目，並說：「咁做好大方、好公平，呢個關係好合適我。（簽無綫歌手合約？）要行埋多一、兩次先，要睇公司方針。」
官恩娜呵樂易玲
同場的官恩娜簽約華納，被指令無綫高層樂易玲不滿，她說：「有時誤會一個傳一個，相信樂小姐唔係小器嘅人，之前有啲擔心，驚講錯嘢。（請佢食飯？）如果樂小姐賞面梗係會。」她更笑謂慶幸找回無綫的泊車證，之前幾乎要裱起它，並希望有機會再拍劇。
文：影視組