李彩華教練跟身跳得放心
李彩華早前參加內地跳水比賽《星跳水立方》，對於昨日打對台的《中國星跳躍》參賽者釋小龍的一名隨行人員不慎意外溺斃，李彩華昨日接受電話訪問大感震驚及不開心。由於藝人終始不是跳水專業人士，外界已多次指摘電視台為搞噱頭邀請藝人參加，問她覺不覺危險？她說：「我嗰啲訓練好安全，每一次藝人跳水都一定有教練在場先可以跳，教練唔喺身邊唔可以跳水。（會畀助手在場？）可以，佢哋負責遞毛巾、影相之類，所以唔明點解個助手會出事。（慶幸自己早出局？）唔係慶幸，我都好努力練習，呢件事係意外。」
另外，前晚穿透視裝的李彩華出席洋酒活動，提到她在比賽中落敗痛哭。她說：「因為比賽時發燒食咗藥，上到跳水台個腦一片空白，而且跳落嚟好痛，大髀後面黑晒。喊係因為又痛兼知自己失誤，因為之前訓練已經好地獄式。」對於有指大會不准整容者勿參加，有傳不少藝人如范冰冰拒絕參賽，李彩華說：「我有收到個email話如果整過個鼻同胸就唔好參加，覺得幾搞笑，咁呢個咪最好嘅證明我冇整容囉！跳落嚟好痛，如果有整胸都爆。」