葉翠翠拗裂腳骨 死頂開工
【呂詠雯橫店直擊】香港先生高鈞賢早前腳傷，事有湊巧其緋聞女友葉翠翠正身在橫店拍劇不慎跣倒令右腳骨裂需要停工，可謂苦命鴛鴦。葉翠翠坦言現階段只有對方才明白自己苦況。不過她放棄打石膏，寧願搽藥膏死頂繼續拍攝。
葉翠翠正身在橫店，本為劇集《金枝慾孽貳》進行拍攝。可惜到達當地第三日只開了一日工，便不慎被房間內的水跣親拗柴，導致腳臼受傷及右腳腳背骨裂。昨日她撐住兩支拐杖，到下榻酒店的大堂受訪：「照咗X光，醫生話要打石膏兩個多月，但我唔想離開橫店而錯失拍攝機會，所以搽藥膏頂住先。但醫生話如果第時啲骨可能生歪，到時要做手術磨走。依家劇組安排到十九日之後先拍我戲份。」
問到同劇緋聞男友韋家雄有否慰問，她說：「佢無時間呱！唔知佢知唔知。」葉翠翠坦言已與另一位緋聞男友、同樣腳傷的高鈞賢聯絡：「佢有經驗，我都有問佢點做。依家除咗佢真係冇人可以明白我嘅苦況。拗柴當時以為自己會癱，好似世界末日咁。依家喺酒店五日都叫外賣，洗澡就彈吓彈吓咁行去。好在酒店房可以上網，否則悶死。」
獲提醒唔好亂用力
葉翠翠表示劇中與蔡少芬和簡慕華最多對手戲，對於有傳她頻頻NG令蔡少芬不滿，葉說：「我都未同佢有對手戲。我拍咗一日只係同當地演員。加上當時佢都未到橫店，一笑置之。」記者聯絡上同樣腳傷的高鈞賢，他坦言有問候翠翠的傷勢，他謂：「佢冇打石膏，我叫佢唔好亂用力，我好明白佢，因為我都好慘，依家自己每次沖涼都要最少半小時。」