陳豪蔡少芬淪布景板$120任影
【呂詠雯橫店直擊】陳豪與蔡少芬昨日在橫店影視城拍新劇，由於任何人只需付100元人民幣（約港幣120元）便可在影城「觀星」，蔡少芬與陳豪慘淪人肉布景板，除了不時遭要求合照簽名外，就連受訪時亦被迫充當遊客自拍照背景！
陳豪與蔡少芬（Ada）昨身處橫店影視城拍攝無綫劇集《金枝慾孽貳》，由於只要付100元人民幣便可入影城「觀星」，吸引近半百遊客在影視城蹓躂。遊客除遠觀Ada和陳豪風采外，更成功衝破劇組人員防線上前求合照及簽名，膽小的則趁Ada受訪時以其作背景晒V自拍，忙於受訪的Ada慘淪布景板亦無力反抗。
帶愛女四處遊玩
Ada直認內地劇《後宮甄嬛傳》熱播後劇酬急升，提到當年佗B拍《後》劇，她笑言楚兒腳頭好，要趁囡囡年紀小帶她到處去，因怕入學後沒機會。她爆愛女如樹熊纏身：「陳豪話我個女大個會係武術高手或者運動員。」提到內地藝人叫價高，Ada說：「一買一賣身價代表演員辛勞，劇本好的話，演員唔介意減價。」
陳豪得知女友陳茵媺指拍劇曬到出雀斑時，即指自己同病相憐：「我尋日曬咗一日都紅晒，頭頂位置有條界。（戴頭套關係？）搞到保持多年嘅美白一朝喪。」他坦言嚮往拍內地劇，又賣口乖指無綫藝人在內地拍劇有優勢。
被指冇履行合約
另外，昨日有內地消息指Ada與代言公司在內地對簿公堂。Ada經理人直認官司仍在審理中，並指Ada對事件感憤怒：「佢唔係要賠償，係想攞番公義。我哋之前喺微博見到個廣告仲登緊，但份約已經過咗期，我哋發咗幾次警告信畀老闆，但佢唔理，跟住反告Ada話佢懷孕係冇履行合約！合約冇註明懷孕係違約，而且亦寫明要Ada出席活動係要一個月前通知，但個老闆根本出示唔到相關證明。」