傅穎爆大鑊被羅仲謙打

自言今天會往北京長時間發展兼「定居」的傅穎，昨日出席時裝活動時，提到她在微博暗示曾被情傷兼受暴力對待，傅穎初時欲言又止，後來被再三追問下，她才說：「我唔想畀人話我模棱兩可、想搵嘢講，我每次講嘢都有顧慮，但句句係真心話，總之我係感情身心受創。」她續稱想往北京前放低不快事：「唔想精神虐待自己，只係想抒發感受，要放低鬱結，唔係為宣傳。」

唔止一次背叛

一臉委屈的傅穎說：「件事（拍拖）係出碟時，我有同羅仲謙一齊過，分開唔止一次、背叛亦唔止一次，呢段關係身心受創。我係一個女仔，過咗去唔想再諗，亦唔想成日都講。（你哋幾時一齊？）我哋拖拉咗年半，係2010年開始同佢一齊，當時唔知佢有女友。我唔想再放喺心度，精神折磨自己。我最錯嘅事係同番佢一齊，再發現佢背叛我，佢根本冇同女友分開，仲要同多兩個女仔一齊，對我打擊好大！個心好難受，身體都有受傷！」

問到是否被羅仲謙打？傅穎停頓數秒後才說：「有人問我，我就話係跌親，都過去咗。（即係羅仲謙有郁手？）總之唔係跌親。（點解打你？）因為我揭穿咗佢（指一腳踏四船）！（有冇諗過報警？）我冇諗過，我唔想畀人話我製造話題，我依家冇出書冇出碟，想走之前放下包袱，唔想再提呢個人個名。」

問到當初復合是否羅仲謙應承和女友分開？傅穎說：「係，我最錯係同番佢一齊，我好自責。（幾時真正分開？）上年分開，隔幾個月又一齊，直至上月分開。（幾時向你郁手？）上月打我，我哋真正分開原因係發現佢有其他女仔，我哋為呢件事嗌交。（對你出拳？有冇用武器？）冇用武器！」據知，羅仲謙的小三、小四涉及圈中人。

羅仲謙出席記招時眼濕濕。

傅穎看完謙仔的電話後非常激動，男方即時出手制止。

驚動異性朋友

傅穎突然自爆和羅仲謙的恩怨情仇，令兩人同屬的經理人公司陣腳大亂，並安排原本昨午為新劇《On Call 36小時》開工的羅仲謙，立刻返公司舉行記招。

昨午五時許，一身黑衣打扮的羅仲謙神情肅穆，並眼泛淚光示人。他最先「唉」了一聲，才戰戰兢兢地說：「我上次處理得唔係咁好，不過，我好珍惜同佢之間嘅感情，所以有搵番佢，感覺上有機會，冇耐又喺埋一齊。但基於信任問題成日鬧交，亦都曾驚動異性朋友。有次佢check我電話嘈起上嚟，佢情緒好激動，手舞足蹈，我要諗方法制止佢，可能咁樣整到佢。之後大家發現冇晒信心，好難喺埋一齊，所以決定分手。」羅仲謙語畢即表現欲哭無淚的樣子，問到會否向傅穎道歉及感後悔時，經理人李小姐即以趕開工為由避答。之後他到北區醫院開工，拍了約一小時後先到九龍灣取車後返回大埔住所。

據知兩人復合後，傅穎不時檢查羅仲謙的手機紀錄，如查到有異性來電，會自行直接致電對方問與羅仲謙有何關係，而羅仲謙身邊朋友亦指不信男方出手打人，認為可能是誤會而有所推撞。

傅穎偷看謙仔電話，令男方非常不滿。（設計圖片）

傅穎看完謙仔的電話後非常激動，男方即時出手制止。（設計圖片）

星皓極為不滿

據知，傅穎與謙仔這次復合，經理人公司星皓事前毫不知情，星皓對此極為不滿，決定取消傅穎北京所有工作，惹來雪藏揣測。記者致電發言人李小姐求證，李小姐說：「由於事出突然，公司唔知佢講啲咁嘅嘢，所以要佢先留港處理同交代晒事件先。」而星皓老闆王海峰亦在微博力斥傅穎不聽話：「私人事私人處理，我三番四次話不要公開討論，有甚麼可向公司反映，但今次是公司不知情的情況發生，有人連我的說話也不聽，所以我也不會管。」

文：名人組