阿呂楊小娟捍衞聲譽法律追究
藝人呂良偉無辜被《壹週刊》指育有兩名女兒，令太太楊小娟怒不可遏，昨帶同律師急忙召開記者會，怒斥報道失實嚴重影響其家人聲譽，誓言一定追究到底！
昨日《壹週刊》指呂良偉曾與一名女子「阿茵」有過一段婚姻，並育有兩名分別二十和十八歲的女兒呂善螢和呂善婷。太太楊小娟昨日偕同呂良偉胞弟呂良國、胞姊呂良薇，及呂良國與前妻張彤欣（即周刊所指的「阿茵」）所生的女兒呂善螢和呂善婷舉行記招，記招枱上還放有該本周刊，楊小娟力斥報道失實，呂善螢和呂善婷更帶備出世紙及父母的結婚照、生活照，力證父親是呂良國，阿呂只是她們的伯伯。
斥冇道德亂咁噏
楊小娟怒斥報道十分荒謬：「真係好嬲，嚴重影響阿呂聲譽和詆毀佢嘅形象，亦影響到好多個家庭。我個仔同Daddy講電話都喊，佢仲要面對同學。報道實在太謊言同荒謬，事實兩個女仔係我姪女，我哋以前仲一齊住。最離譜記者冇向我求證過，報道連傳聞個『傳』字都冇。你哋翻查香港嘅新聞，呢單真係最離譜！最嬲係話我一早知件事，又話只係阿呂搵細佬頂替，呢啲咁冇道德嘅嘢點講得出口？！」
楊小娟指丈夫阿呂入行卅多年， 一直埋首工作四出拍戲，事件嚴重影響其形象，令他負上不負責任男人之名，故誓必採取法律行動，首先要對方道歉，其他交由律師處理。而在場的關律師則表示正了解有關情況。問到呂善螢為何在報道中認阿呂為父？她說：「記者只問過我『阿茵』係咪你媽咪，我答係仲問佢咩事。佢冇問過我呂良偉係咪我Daddy，但報道出嚟扭曲咗。佢之後問我鍾唔鍾意睇Daddy做戲，我話鍾意。」在旁的呂良國說：「其實我係亞視第一期訓練班嘅，做過小角色、閒角和飛仔，電視翻播個女都有睇過。」他指事件影響到前妻和她的家庭，楊小娟指張彤欣被記者包圍店舖令她不敢外出，故未能出席記者會。
直情係思想毒害
記者致電身在橫店拍劇的阿呂，他力斥報道好有問題：「冇實事求是，冇求證過，報道全部都錯，我一定會告，我同太太通過電話，她會搵律師商量。報道無事生非、捏造事實，夾硬嚟完全唔負責任，同秦檜一樣，離晒譜，破壞我的生活同形象。我係正常藝人冇必要被屈！熟悉我的朋友、琴姐（李香琴）和鄭則士都知道係咩回事。」阿呂指欺騙非他作風，今次實在好過分，有必要還自己一個公道：「周刊亂噏都唔係第一次，點解政府冇咩行動，畀人伸張正義。」他覺得今次同有毒食品冇分別，毒食品用食物害人，周刊則用思想毒害人，他感慨地說：「真係道德淪亡！」翻查微博資料，呂善婷於五月尾曾上載一張她跟阿呂的合照，並寫上跟伯伯呂良偉合照。完成記招後，楊小娟與兒子呂善揚步行到附近商廈，期間她不停講電話，未知是否致電給老公。
文：影視組