陳敏之瞄準台慶女配角
劇集《怒火街頭》前晚播出大結局，鄭嘉穎、陳敏之及林子善等一眾演員夾份宴請台前幕後兼睇劇，而胡杏兒及李璨琛因工作缺席。敏之對於自己飾演的「索腿天后」貞貞慘死，直言收看時亦喊到變豬頭，問到會否演出續集？她揚言「客串都制」：「死咗都可翻生啫！可能做孖生細妹呢！」談到獲看好入圍台慶頒獎禮的「最佳女配角」，她說：「梗想！不過有人認同已經當攞獎！」並透露要為陳志雲涉貪案上庭，但未知具體時間。
嘉穎露牙博收視
鄭嘉穎表示將繼續以「Law霸」身份演出續集，問到今集露股罅，續集露啲乜？他笑言未諗到：「露牙囉！（不如叫杏兒露？）唔一定要露先有號召力，嗰啲都係無心插柳！（開電影版？）答唔到，唐基明係有講過，但唔知堅定流！」
滕麗名對於早前被拍得與男士「蜜」遊超巿，她笑說：「就算影到拖手都唔認！『朋友甲』係咁架啦！（驚公開會散？）唔係！（有陰影？）可能啦！」並透露早前被狗仔隊跟蹤，幸有拉窗簾。
此外，敏之昨日出席美容院代言活動時透露，最近憑「索腿天后」美譽密密接騷腿Job，但不知道有否加酬勞，並踢爆不少街坊太入戲：「佢哋話我死嗰幕好傷心！（有冇人入戲到按鐘仔問價？）咁又冇！佢哋反而笑話邊有咁高質素嘅一樓一。」敏之又表示獲男友大讚有進步，對方亦沒有因大膽戲份呷醋。
文：影視組