方皓玟寧做奀星拒擦鞋
歌手方皓玟出道已有十年，屬性格派兼硬頸，她承認經常遭人白眼及冷言冷語，甚至以「奀星」來形容她，方皓玟坦言是個實事求是的人，強調不會為上位及見報而製造新聞，她說：「我只係追求理想。」
方皓玟近日四出為同名精選大碟宣傳，相隔三年再出新碟的她說：「好音樂係要用時間去做，我做唔到一年出兩、三隻碟。」出道十年的她頭三年在台灣發展，04年尾才回流返港，與泳兒、衞詩及胡琳角逐新人獎，對於同期三位新人各有不錯成績，方皓玟說：「冇得咁諗同比較，我做到自己想做嘅嘢。」
為理想入行
打不死的方皓玟坦言從未想過放棄，她說：「喺呢行唔畀我死，當我去到就死嘅時候，就會有一個好好機會，根本冇得我諗，只有繼續落去。（生活應付到？）我要求唔高，有餐飯食已經滿足，茶餐廳、車仔麵都可以，我入行目的係為理想。」方皓玟強調是硬頸歌手，她說：「其實紅唔紅係一片浮雲，今日係主角，明天會變成配角，唔好覺得自己係地底泥。」
多義氣朋友
方皓玟承認見過有歌手為增加人氣搞是非及造新聞，問到為何不效法？她認真說：「呢啲嘢我做唔出，我係實事求是嘅人，好尊重音樂，要靠手段同擦鞋上位，嗰個一定唔係我。（有冇畀人話係奀星？）有，唔介意佢哋咁講，至少我身邊有好多義氣仔女藝人朋友。」
採訪：音樂組