樂基兒老公樣樣冧唔使執
名模樂基兒（Gaile）於2005年曾經往外國隆胸，並成為首個公開承認隆胸的香港模特兒，但後來因不勝負荷而「拆彈」。不過，最近有指Gaile曾率領老公黎明旗下的藝人文詠珊（JM）及衞蘭去韓國整容，Gaile聞言即呼震驚，坦言雖不抗拒，但自己卻不會整容，更好冧咁表示老公鍾意自己，不需要咁做！
Gaile昨日為服裝品牌JUICY COUTURE新店開幕活動擔任嘉賓，對於拉隊往韓國整容的傳聞大呼震驚！Gaile說：「唔係吖嘛！咁犀利！我唔知你哋想我點答，真係幾好笑！話我去整容已經好好笑，仲要帶埋咁多人去驚冇人知，仲好笑！我個個星期都見你哋（記者），我知整容係要時間recover，根本冇可能。（你有冇諗過整容？）冇諗過，但係唔抗拒，其他人係有權做呢樣嘢。但我對自己好滿足！（JM同衞蘭想整容？）我諗佢哋唔會。」
力撐JM衞蘭
之前已被指有孕的Gaile，笑言起碼該報道不再是寫她大肚，記者笑問是否寧願被寫大肚？Gaile說最好不要有大肚或整容這些新聞。至於如果要整容，想整哪個部位？Gaile說：「冇嘢想整，咁耐以嚟都冇客人投訴，又冇客投訴我肥。（黎明有冇話唔滿意你邊度？）唔會，鍾意嗰個人就係鍾意佢。」Gaile再重申認為JM和衞蘭是冇整容，認為她們冇整容念頭，「同以前一模一樣，可能夏天着得少啲，啲男人覺得女人靚咗啩！」
文：名人組