李克勤仔細老婆嫩押後玩嘢
尋求突破、愛新嘗試的李克勤，一直恨做「棟篤唱」，但遭經理人提點非合適時間，因為他仔細老婆嫩，應該要着眼搵食為主，不過克勤深信終有一天能圓心願。
曾與香港管弦樂團舉行演唱會的克勤，十年後再將與香港小交響樂團合作，在七月十七至廿一日在紅館舉行演唱會，他笑說：「上次係受薪，今次藝能係老闆。」
足球發燒友的克勤以作客及主場形容兩次合作，他笑說：「作客去人哋個更衣室，今次主場係自己地方。」他坦言上次受薪歌酬好少，不成比例，但當時非為錢而做，至於今次則回復正常。
本來克勤計劃在灣仔伊館舉行「棟篤唱」，但最後決定撻訂改在紅館搞演唱會，因為蝕本無疑，他笑說：「我自己做老闆都得，但張國忠（經理人）覺得我啲仔咁細，都係做啲搵到食嘅，唔好咁快為興趣而做。」連校長譚詠麟也被拿來開玩笑，他笑說：「你睇阿倫（譚詠麟）都仲係做緊搵食嘅嘢。」克勤承認恨做「棟篤唱」，因為乃新嘗試，他說：「人一世物一世，引人笑好開心，自己又開心，終歸有一日可以圓願。」
少花巧成本超貴
今次與小交樂響團合作，比一般港式演唱會少了花巧，一切從音樂出發，他笑說：「今次唔使操大隻，唔會好似《左麟右李》咁誇張、嬉戲好似開派對，今次係以音樂去娛樂大家。」克勤坦言製作成本超貴，除了好多樂譜要重新編寫，排練時間也要倍增，之前表演過鋼琴自彈自唱的他說：「今次唔會玩樂器，人哋咁大棚人，仲咁專業，我唔搞啦，不過都有啲驚喜畀大家，希望係『喜』啦。」
文：音樂組
Hair：Adolph Bow
Makeup：Angel Yip
衫：FRED PERRY