阿佘試水溫翻啅鄭嘉穎
明日三十六歲生日的佘詩曼，即使緋聞及搵銀一樣多，但在情路兜兜轉轉交白卷，名副其實是「剩女」一名。不過阿佘昨日在活動中頻向前緋聞男友鄭嘉穎主攻，更隔空問鄭嘉穎有否拍拖，明顯「試水溫」！
喜運佳珠寶鐘錶集團和瑞士名錶品牌愛彼錶合作，首次在香港以專門店形式假圓方開設愛彼錶專門店，昨日喜運佳鐘錶集團董事蔡加讚、旭日國際集團主席蔡志明博士及愛女蔡加怡，率領嘉賓佘詩曼和鄭嘉穎出席新店開幕酒會。
全程主動搭膊碰杯
曾經傳出緋聞的阿佘及鄭嘉穎展示品牌高級腕錶系列時，明顯阿佘表現大方，主動向鄭嘉穎打招呼，騷錶時更借意搭向男方膊頭大擺甫士，但嘉穎卻表現繃緊十分不自然。在祝酒環節時，阿佘更展露燦爛笑容，主動向鄭嘉穎碰杯，而鄭嘉穎依然保持避忌，冇太大反應。面對阿佘的主攻，雖然鄭嘉穎處處緊守在防守狀態，但卻不時趁着阿佘放眼四處時，即偷望阿佘！
阿佘事後表示是按大會要求主動搭鄭嘉穎膊頭，更否認鄭嘉穎表現避忌，問到如非大會要求會否保持距離？阿佘說：「唔會！點解會？自從上次拍劇到依家都好耐冇見，大家都有互相聯絡。（情侶檔酬勞好啲？）咁耐冇見，今日又有靚錶睇，又可以搵錢，酬勞真係要問番經理人。」
緋聞多多的阿佘被問到感情狀況時說：「等待囉！（你同鄭嘉穎會唔會翻撻？）哈！你哋食唔食蛋撻？（如果佢追你？）都係朋友囉！佢係一個好好男仔，假設同如果嘅嘢無謂講，依家我同佢係好朋友。」笑問有否八卦鄭嘉穎有沒有拍拖，阿佘說：「你哋問佢啦。（佢唔會同我哋講真話！）哈！咁佢都未必同我講真話喎。」
早前被傳搭上有婦之夫而立刻出聲明澄清的阿佘，說這新聞是胡鬧一場：「冇咁好氣，大家冇聯絡，要平復吓，大家都為呢件事而唔開心。」她續說有收過通知就陳志雲一案要上庭，但未知日期。
處處維護口不對心
另外，曾經為了佘詩曼而撇周麗淇的嘉穎，昨日對阿佘表現避忌，但卻出口處處維護對方，明顯口不對心！尤其對於阿佘慘被傳搭上有婦之夫，嘉穎說：「我當然撐佢！一定唔信呢件事，咁無聊嘅新聞！（有冇問點知係咪？）佢好快出咗聲明啦！呢啲新聞對女仔嚟講傷害好大！（上次傳同你阿佘都冇出聲明？）今次同上次唔同，呢個係結婚同未結婚嘅分別！我信佢冇做過，好人係唔會咁做，我清楚佢人品，so far大家係朋友。」
採訪：名人組