歪面鍾嘉欣讀書難埋堆
新一屆香港小姐日前舉行首輪面試，各路參選者被迅速起底，當中被指貌似邵音音的「歪面鍾嘉欣」孫儀凌（Elise）就被踢爆就讀大專時英文名叫Aka，主修時裝設計，但人緣認真麻麻，每次group project亦難以埋堆，雖然周身名牌，但打扮MK，經常被指穿A貨，相比往日嘅樣與現在純熟chok樣，簡直判若兩人。
拍喊戲七情上面
Elise入行決心大，曾參加唔同選美比賽，當中包括電器產品大使、品牌代言人選舉，亦做過《公主嫁到》及亞視《香港亂噏》節目老臨，又曾擔任歌手鍾一憲（Jason）MV女主角，Jason接受電話訪問說：「記得佢，（選港姐喎？）吓，係咩？佢冇話我知，佢份人平日好謙卑有禮貌力爭上游，都有同佢交換電話。」Jason又透露Elise曾於電影《毒禍》客串：「覺得佢好好戲，喊到眼都腫晒，七情上面。」
香港澳洲唔憂悶
此外，有讀者爆料指「低胸汪詩詩」何焯文（Tiffany）曾於09年參加港姐，於第二輪面試被foul，及後到澳洲「反擊」奪得悉尼華裔小姐亞軍，成功一雪前恥，報料人又表示Tiffany中學時代只與男同學玩，性格爛蒲，男友數之不盡，香港及澳洲均有男友。
至於歌手狄易達昔日師妹「闊面周秀娜」蔚雨芯（Rainky，原名：劉家麗）出席活動唱歌片段就熱播Youtube，亦同時被翻舊帳，就讀中一時扮中四，又自開戶口扮fans，當時Rainky更以粗口諧音反擊，烈女性格表露無遺。
文：音樂組