日前楊愛瑾（Miki）帶師妹唐素琪（Chelsea）往置裝掃超短熱褲，期間Miki頻頻指點Chelsea，務求為師妹打造索女形象；而Miki就一反常態專攻男裝，擺明幫男人買衫，難道她已悄悄地墮入了情網？
日前Miki和Chelsea扮到靚一靚行尖沙咀，先到書局打書釘睇時裝雜誌，取完免費經後，兩女即去boutique睇衫。向來有品味的Miki，不停幫師妹揀熱褲。本身穿了斜膊長tee騷腿的Chelsea亦對熱褲情有獨鍾，看來她對自己一雙美腿很有信心，視之為冧歌迷的必殺技。
熟悉size
Chelsea即將推出處女碟，難得有師姐Miki教路幫她執靚形象，一於聽晒師姐話。Miki在店內巡視了一圈，就幫Chelsea揀了一條超短熱褲和tee，當Chelsea入了試身室，Miki就悄悄地去睇男裝，男裝外套、長褲、衞衣乜都睇一餐，似乎心大心細難以抉擇。最後Miki揀中一件型仔外套，膊橫袖長，Miki似乎對「他」的size十分熟悉，相信「他」必定身材高大，絕對襯得起Miki。
送畀哥哥
由於Miki近年甚少傳緋聞，事後記者致電問她是否「開齋」拍拖？Miki哈哈笑地說：「我都冇拍拖，邊有男友呀！我買衫送畀哥哥咋，佢好錫我，我哋兩兄妹感情好好。」Miki又大讚師妹Chelsea唱功了得，故幫她打造索女形象，希望在樂壇闖出名堂。Miki說：「我知道佢好畀心機唱歌，好緊張新碟反應，所以咪幫佢揀衫囉。我覺得佢對腳幾靚，提議佢着多啲熱褲，希望佢吸引多啲人注意。」
文：音樂組