為求博出位，好多自覺有料嘅韓國模特兒都唔介意喺社交網展露自己嘅天賦本錢，希望以誘人嘅事業線嚟吸引眼球。不過，唔係人人都鍾意出呢招，好似人氣模特兒嚴祉雅，雖然胸前有料，但好少喺個人網站展露出嚟，因為阿妹覺得咁做太着迹，費時畀人一種恃胸吸睛嘅感覺喎。
喺首爾出生嘅嚴祉雅，早喺2012年就獻出自己嘅第一次，以職業模特兒身份亮相釜山國際車展，並憑住高挑身形同玲瓏浮凸嘅三圍，成為展場上嘅焦點。不過，阿妹覺得身為一位模特兒，氣質先係最重要，所以之後有雜誌搵佢拍性感寫真，都被一口拒絕。由於首次演出令好多人留下深刻印象，阿妹喺翌年成為咗南韓CJ超級賽車嘅官方專屬模特兒，之後仲為多支車隊擔任模特兒。除咗活躍於賽車場，阿妹亦開始做Show Girl，令曝光率更高，人氣亦愈嚟愈勁。