擁有前凸後趷身材嘅囡囡，本身足以成為男士們嘅焦點，加埋一副甜美面孔嘅話，仲唔係女神級？難怪南韓模特兒兼賽車女郎嘅尹升妍，憑住出眾嘅外形而獲得極高人氣，加埋純美氣質，成為男士們心目中嘅女神。
每個女性都希望美貌同身材兼備，吸引眾人嘅目光，不過有人卻恰好相反，雖然條件出眾但係唔想成為大家嘅焦點，好似尹升妍就係其中一位。喺讀書時期已經成為風頭躉嘅佢，外表迷人，樣貌甜美可人，身材更係玲瓏浮凸又火辣，一對驕人雙峰足以令男生神魂顛倒。不過佢一啲都唔享受經常被人注視嘅目光，覺得好似被人監視一樣，因此佢刻意穿着大碼衫嚟遮掩豐滿嘅身材，同時戴上眼鏡及剪個老土髮型，希望低調一啲，將自己隱藏喺人群之中。
縱然佢一心諗住收埋自己，但係命運嘅嘢就係估佢唔到，話說佢修讀時裝設計嘅好姊妹，有次要進行時裝表演，點知有個模特兒甩底，令佢相當苦惱，於是臨時拉尹升妍幫忙客串做模特兒。尹升妍以為只係行吓天橋就得，卻估唔到現場竟然有唔少星探喺度，而佢出眾嘅外形即時被人睇中，起初佢一一拒絕，不過當中有間模特兒事務所相當有誠意，為佢安排晒發展計劃，仲帶佢參觀事務所點樣運作及模特兒如何演出，最終佢被對方嘅誠意打動，2008年便以攝影模特兒身份出道。對於零經驗嘅尹升妍嚟講，每次演出都覺得相當新鮮，同時又感到困難，好彩得到前輩嘅幫助，令佢有飛躍嘅進步，做得愈嚟愈好。
2010年佢首次以賽車女郎身份喺賽事上登場，性感嘅賽車女郎制服加上激凸身材，令佢成為賽場上嘅焦點。不過由於啱啱加入賽車女郎界，大家對佢嘅認識唔係太深，為咗提升知名度，模特兒事務所推薦佢參加賽車女郎選美淘汰賽，憑住可愛嘅樣貌及魔鬼嘅身材，配合清新嘅純美氣質，升妍喺競爭激烈嘅淘汰賽中過關斬將，最終獲得亞軍。經過比賽之後，唔單止人氣提升，自信心亦增強咗唔少，跟住落嚟先後喺多個賽車活動中登場，翌年首次以車模身份喺國際車展為汽車品牌站台。
不過講到佢最矚目嘅演出，卻跟模特兒工作一啲關係都冇，而係同棒球有關。須知道南韓嘅職業棒球聯賽，有邀請嘉賓進行開球禮，2011年6月喺釜山進行嘅比賽中，尹升妍獲邀客串做啦啦隊，同時以超性感嘅造型進行開球禮，佢甫出場立即成為全場焦點，而呢次活動之後，佢嘅人氣登上頂峰。不過尹升妍話呢次活動令佢十分尷尬，事關佢唔識打棒球，雖然事前進行過投球動作訓練，點知喺發球時卻唔小心將球狠狠地投中吉祥物個頭，清脆嘅命中聲引嚟全場觀眾大笑，令佢尷尬不已，好彩事後大家對佢嘅失誤唔介意咋！
簡介：尹升妍被喻為最有星味嘅模特兒之一，配合埋玲瓏浮凸嘅身材，絕對可以喺演藝界發展，但係點解佢冇咁諗過呢？原來佢覺得自己嘅工作壓力已經相當大，若非有最好嘅機會同把握，佢仍未有投身演藝界發展嘅心理準備。如果大家想了解佢多啲，就要Click入呢個網站喇！
網址：http://cafe.daum.net/model-YSY
出生地：首爾
身高：168cm
三圍：35-24-35
撰文：魂