如果想成為一位人氣模特兒嘅話，擁有出眾嘅外形可以話係最基本嘅條件，事關外形若然唔夠吸引，試問又點能夠吸引大家嘅目光呢？對於南韓模特兒柳莉顏嚟講，佢嘅外形真係無可挑剔，唔單止充滿魅力，氣質更係優雅，難怪火速成為人氣女模。
若然擁有美貌及出眾身材嘅話，如此天生麗質梗係做模特兒搵食，但係柳莉顏最初並未諗過全職喺呢行發展，佢表示當初諗住做兼職模特兒賺外快，由於佢樣子甜美及身材惹火，不但獲得攝影師嘅好評，模特兒事務所更係樂於為佢安排各種工作，因為曝光率高，令佢好快喺攝影模特兒界獲得相當高嘅知名度。有見如此，事務所便提議佢考慮轉做職業模特兒，咁樣可以令佢未來喺模特兒界嘅發展更加廣闊。呢個時候，恰好佢嘅工作正處於瓶頸狀態，既然面前有如此好嘅機會，因此佢決定試吓有冇更好嘅發展空間，就係咁，佢便以職業模特兒身份正式投身模特兒界。
之後，柳莉顏嘅事業發展得相當順利，先後為多本美容、化妝及汽車雜誌拍攝寫真，人氣亦不斷攀升。而為咗有更高知名度，事務所便安排佢參加模特兒選美比賽，挾住喺攝模界嘅名氣，加上優雅嘅氣質，喺比賽中獲得極佳嘅評價，最後獲得最佳新進模特兒獎項，為柳莉顏打下強心針。
比賽之後，柳莉顏唔單止繼續活躍於攝模界，工作亦開始伸展到其他模特兒領域，首次以車模身份喺國際車展上為汽車品牌站台，玲瓏浮凸嘅身材加上過人嘅氣質，令佢成為展場上亮眼嘅焦點，正因為佢喺車展上誘人嘅出色表現，自此之後佢便頻頻喺各個大型車展上亮相。不過作為一位人氣模特兒，又點能夠唔趁呢個機會積極向賽車女郎界發展呢？之後佢被事務所安排喺超級跑車比賽上登場，性感嘅賽車女郎制服將佢副火辣身材展露無遺，令人氣急升至頂點之餘，更被賽車隊伍睇中，簽佢成為車隊嘅專屬賽車女郎。
事業發展到呢個階段，喺唔少模特兒嘅眼中，能夠喺出道短短一年嘅時間，便已有呢個成績可以話相當成功。但係對事業相當有野心嘅柳莉顏嚟講，如此成績並未算滿意，而咁啱呢個時候，有參加電玩展嘅廠商想搵模特兒Cosplay動漫角色，而柳莉顏嘅火辣身材正好符合廠商嘅要求，就係咁佢踩咗入Cosplay界，將原著角色充分演繹，成為一位非常亮眼又令人印象深刻嘅Cosplayer，其後佢扮演日本人氣漫畫《One Piece》有「海賊女帝」之稱嘅寶亞‧漢哥古，更係為人所津津樂道。不過柳莉顏表示，未來仍然會以模特兒工作為重心，唔會成日玩Cosplay，希望佢以後能夠有更好嘅發展啦！
出生地：首爾
身高：172cm
三圍：35、24、35
簡介：柳莉顏最為人所注目嘅地方，莫過於佢激凸嘅上圍，事關如此動人嘅胸器，加上性感嘅造型，無論任何時候都能輕易成為男士嘅焦點。不過對於佢嚟講，卻希望有更多人了解佢嘅性格，佢認為自己嘅內在美同樣值得大家喜愛。如果想了解柳莉顏多啲，就要Click入呢個網站喇！
網址：http://cafe.daum.net/yourian
撰文：魂