有時真係幾混淆藝術同色情，事關有啲電影露點兼有激烈床上戲，卻稱為藝術電影。咁如果喺AV中加入有深度嘅劇情，再加啲藝術攝影角度同剪接，係咪又可以變成藝術作品呢？所以色情同藝術只係一線之差，睇吓你從邊個角度出發，好似有位攝影師拍咗一輯「性高潮」作品，唔知大家認為係藝術定色情呢？
色情同藝術究竟係咪一線之差呢？嚟自立陶宛首都維爾紐斯嘅攝影藝術家Albert Pocej，其一個名為「Orgasm」嘅藝術系列，最近引起大家嘅關注。「Orgasm」中文解做性高潮，為咗表現女性高潮嘅一刻，Albert邀請20位模特兒參與呢項相當大膽嘅攝影創作。不過有部分模特兒聽到攝影過程中唔可以扮高潮後而退出，亦有部分因為太過緊張而達唔到性高潮效果，結果Albert最後只能完成15張高質量攝影作品。可能有人會問呢種類似色情攝影嘅作品，究竟有乜嘢意義呢？Albert表示現今社會嘅女性，當佢哋同性愛扯上關係時，總會被有色目光看待，為咗提倡女性有權追求冇包袱嘅性愛快感，於是佢透過鏡頭表達自己嘅立場，同時鼓勵男性應關顧女伴嘅性愛體驗，以達致雙方都能夠享受床上歡愉。
藝術家唔單止要有塑造出美感嘅能力，同時亦要有創意先至可以吸引大家嘅注意，好似嚟自美國嘅攝影師兼藝術家Joel Alvarez咁，憑住一捆捆電線膠紙，配合身材玲瓏浮凸嘅模特兒，展現出性感與藝術感兼備嘅特殊美學。話說喺2008年，由Joel領導嘅攝影團隊被委託拍攝一輯以黑色電線膠紙為主題嘅攝影工作，當時顧客嘅要求係簡單地用膠紙綑綁喺模特兒身上便可。就係咁啟發咗Joel嘅靈感，佢嘗試將黑色電線膠紙剪成唔同嘅形狀，黐喺模特兒身上以營造出藝術感，結果誕生名為「Black Tape Project」嘅攝影藝術系列。經過多年嘅發展，佢哋已經唔再局限以黑色電線膠紙進行創作，加入銀色及金色電線膠紙，配合模特兒唔同嘅造型，令觀賞性大幅提升。今時今日，Joel不但經常舉行攝影展，同時又為車展、時裝展等活動上，展現與別不同嘅膠紙魅力。話時話，模特兒要好忍得痛至得，事關喺重要部位上直接黐上膠紙，當搣膠紙時真係痛到標眼水囉！
坊間有唔少性學家提供方法，等男女可以喺性愛過程中獲得高潮，只係呢啲性學家往往從心理角度出發，卻甚少從科學嘅研究角度為大家提供意見。而美國Liberos實驗室嘅負責人Nicole Prause博士，經過長達10年嘅研究後，發現最能達到高潮嘅方法，就係自娛！博士表示經過多年嘅研究發現，始終係自己最清楚又最了解個人生理構造，例如邊個部位最能挑起情慾、邊個動作及力度最能產生快感等，而即使詳細地同伴侶分享，對方始終及唔上自娛咁得到滿足。唔係喎！性學家話性愛可以令人覺得更快樂喎！Nicole Prause博士表示，其實自娛同樣可以達到呢點，同時可以產生減壓及幫助睡眠嘅效果。如果按佢咁講，啪啪啪咪冇晒意義？博士話未必，因為性愛始終離唔開心理上嘅滿足，對於女性嚟講更係重要，更何況佢表示呢個滿足度只係平均值，每位男女對性愛都有唔同需要，又唔可以一概而論咁話。
撰文：魂