有間專為女賓服務的美容院，有一日，來了一位女客，雖然唔係十分靚，但有一對水汪汪眼睛，令人有騷媚入骨感覺，出手又夠爽，竟有十元貼士。
六號師傅曰：「呢個大眼妹，又好傾又夠疏爽，係我嘅。」
第二次，大眼妹來，六號真係爭住做，本來佢做開一位師奶，算係熟客，即刻搵個同事換手，趨前招呼，之後，大眼妹來過幾次。
一晚，六號執到好正，同事曰：「是否佳人有約？邊個？」
六號曰：「第二個約我冇咁精神，總之今晚就正啦，唔話得你知。」
眨吓眼過咗個零月，一日，有個洗頭仔，名叫發仔，對老闆娘曰：「有件事要話你知，唔知你信唔信？」
老闆娘曰：「你講來聽吓。」
「六號闖咗禍，可能佢自己都唔知，最好你通知佢即刻辭職走人，有咁遠走咁遠，走唔切則搵地方匿埋三兩個月，否則恐怕唔係幾妥。」
老闆娘曰：「你點知？」
發仔曰：「我亦係偶然知道，但我唔敢對佢講。」
老闆娘曰：「是否與女人事件有關？」
發仔曰：「九成係。」
老闆娘明知六號食得禾米多，亂咁食當然遲早會撞一次板，於是對六號警告曰：「你近來行桃花運啦，是否同人客搞到唔三唔四？」
六號曰：「有時做吓朋友，並冇唔妥，將人客碼實，其實對公司有益處。」
老闆娘曰：「我睇你都係休息吓，請一個月假啦。」
六號曰：「我冇事，因乜事要請假，你唔好聽人點。」
過兩日，六號在街上被人插咗兩刀，兇手係一個大漢，行兇後坐電單車逃去。
老闆娘問洗頭仔點解咁叻，未卜先知？
洗頭仔曰：「大眼妹係一位山頭大佬嘅金屋藏嬌，六號同佢滾埋，自然係自己攞嚟衰，我有個朋友係大佬馬仔，所以我知，可惜六號水浸眼眉唔知死。」
此後，亦不再見大眼妹來洗頭了。
一九七四年十二月二十三日
記住係「食得禾米多」而唔係「食得皇米多」，意思係指有啲人好事多為，長時間偷取利益，結果得到唔好嘅下場。不過大家又知唔知呢句說話點嚟呢？以前中國南方多數係種植稻米嘅農民，每次佢哋曬穀總會引嚟雀鳥啄食，於是便設陷阱捕捉，每當捉到雀鳥時便會同隻雀講：「你都食得禾米多。」以諷刺隻雀貪食而落得被捉下場。