有間百貨公司，一日，有個中年男子來到，要見經理，似乎有要事，十分匆忙，經理接見，男子曰：「我係某大機構老闆夫人嘅保鏢，老闆夫人現在貴公司，正在欣賞各種貨物……」
經理曰：「歡迎，我哋會好好招呼。」
保鏢曰：「不必招呼，夫人係嚟偷嘢，所以我先放低一千元，請你設法通知場內嘅職員，如果見到夫人妙手空空，千祈唔好干涉，一於詐睇唔到，但要記住佢偷咗乜嘢，開單，在一千元內扣數，稍後我哋會有人來結帳。」
經理見有咁古怪之事，答應幫忙，問曰：「夫人嘅服飾打扮如何？」
保鏢曰：「四十來歲，穿中庸裝，貴婦打扮，孭一個新潮手袋，特別大，我現在會返去夫人身邊。」
經理乃用閉路電視找到該貴婦，並用內線電話通知職員注意。
在閉路電視下，果然見夫人偷咗一套童裝、一罐果仁朱古力，後來又到餐具部，偷一個煙灰盅、一把餐刀。
各部門職員，皆已接獲通知，暗中監視，閉路電視亦一直加以監視，睇戲咁睇，發覺該貴婦每偷得一樣物件，臉上即現出勝利微笑。
保鏢跟在貴婦後面，大約一小時，然後離開公司。
翌日，保鏢來結帳，向經理特別致謝，經理曰：「從前香港有一位富家太太，亦患此種偷竊病，又係經常要出去偷嘢至安樂，各大公司辦館皆知，所以任佢偷，然後開單去收帳，難道你東翁之夫人亦有此怪癖？」
保鏢曰：「據說，老闆娘患有失眠症，一發作就要出來偷嘢，順利得手之後，晚上就瞓得好安樂，如果有人監視，不能得手，則成晚失眠，度橋點樣再偷過，有時一連失眠好多晚，所以老闆就想出任佢偷嘢嘅辦法，治其失眠，據說好過睇醫生，佢偷偷埋埋咁多物件，則隨意送畀親友，當然係順手發財得來。」
經理曰：「下次你老闆娘來，記得請佢去珠寶部門行吓。」
一九七四年十二月十五日
「妙手空空」可解做小偷，呢句成語出自宋朝翰林學士李昉著嘅《傳奇‧聶隱娘》中一段：隱娘曰：「後夜當使妙手空空兒繼至。空空兒之神術，人莫能窺其用，鬼莫得躡其蹤，能從空虛之入冥，善無形而滅影……」意思係隱娘話：「半夜佢（魏帥）會派妙手空空兒嚟，空空兒嘅神術係他人唔能夠窺見佢嘅手法，鬼唔能夠跟上佢嘅蹤迹。能從天入地，神不知鬼不覺，來無影去無蹤……」