成人漫畫家最強嘅地方，唔單止構思到令人面紅耳熱、心跳加速嘅情慾故事，引人入「性」嘅畫工更係不可少。講到近年以畫工馳名嘅日本插畫家兼成漫家，saitom肯定榜上有名。想知佢嘅畫工有幾出色，就唔可以錯過其人氣單行本《Together》。
各位有留意開日本輕小說同成人漫畫，都應該聽過saitom嘅大名。未聽過？咁佢嘅原名齋藤將嗣，相信有更多人認識。佢曾於2014年11月為日本超人氣動畫《樂園追放 -Expelled from Paradise-》進行角色設定，代表作有《地球隊長》、《BIKINI WARRIORS》等。憑住呢幾套作品，佢喺一般向動漫界大放異彩。不過早喺佢成名之前，其實已於輕小說插畫界及成人漫畫界具有相當人氣。
saitom嘅畫風比較易認，筆下女角色個個都達致無可挑剔嘅級數。大得嚟萌味十足嘅雙眼、尖尖嘅下巴、修長嘅雙腿同埋迷人嘅巨乳，符合晒男士心目中嘅女神形象。除咗迷人女角色外，佢更擅於描繪表情，憑住豐富嘅五官變化帶動讀者情緒。另一方面，要知道插畫毋須交代劇情，而插畫師出身嘅佢，為咗彌補故事上嘅缺點，曾經下過不少苦功，並且向其他漫畫家請教，結果鍛煉出上佳嘅講故事技巧，難怪他被譽為近年日本成漫界、插畫界及動畫界嘅代表人物。
佢喺2011年獲得成漫月刊《COMIC 快樂天 BEAST》發表作品嘅機會，隨住作品發表，佢喺成漫界嘅人氣亦水漲船高，只係由於佢要兼顧為小說繪畫插畫，同埋設計動畫角色等工作，直到2015年3月先至迎嚟佢首本成漫單行本《Together》。
《Together》作為saitom首本發行嘅單行本作品，書中收錄咗佢自2011年至2014年期間，喺《COMIC 快樂天 BEAST》發表過嘅12個短篇作品，當中包括《哪個好呢》、《加班是甚麼味道？》、《真夏的遊戲》、《放學後的小禮物》、《請快跟我做愛吧！》、《做得過火的女友》、《第一次的告白》、《鄰居狂想曲》、《侍奉的代價》、《午夜的病歷卡》、《完美的女孩》同埋《自家製女孩》。喺書末saitom所載嘅感言中，佢感謝每位一直以嚟幫忙嘅漫畫家，令佢喺肉體描繪、高潮表情及液體質感上，都獲得極大裨益。難怪呢本作品推出時，被成漫評論家稱為水準極高嘅作品，佢哋推介書中嘅《加班是甚麼味道？》同《真夏的遊戲》，最值得大家欣賞。
《加班是甚麼味道？》嘅女主角係位美艷OL，只係公司老闆經常對佢性騷擾，因而令佢不勝其煩。呢晚老闆要女主角同男下屬高橋，趕喺明日開會前預備好報告，結果令女主角怒氣爆發。點知唔明女人心嘅高橋，竟稱女主角因着得太性感，先至勾起老闆嘅邪念。女主角聞言決定好好調教對方，卻估唔到燃起自己嘅慾火，兩人就咁喺辦公室嘅洗手間內激戰。
《真夏的遊戲》嘅恭平同香澄由細玩到大青梅竹馬，只係香澄不但係個電玩迷，更經常走到恭平屋企打機。恭平揶揄香澄係一個宅女，唔會趁住夏天去玩，因而令香澄深感不滿。炎熱嘅天氣令香澄香汗淋漓，卻勾起恭平慾火，於是佢對香澄使出祿山之爪。原來香澄早就同恭平表白過，只係一直得唔到對方回應。趁住呢次機會，香澄決定將準備多年嘅「恭平攻略」使出嚟！
漫畫名稱：《Together》
作者：saitom
出版：WANI MAGAZINE
頁數：203頁
撰文：魂