渡海濠情：白羊男人最叻認錯

聽到麻木

小羽話：「我男朋友就係白羊座嘅人，佢個性衝動，可以話諗到乜嘢就做乜嘢，由於做事唔會去諗清楚，所以經常都會撞晒大板，但佢有一樣好，就係發現唔對路就會即時道歉，求你原諒！好似我哋拍拖時，佢上網睇見某食肆有推介，佢諗都唔諗第一時間就會拉我去試菜，但一食之下發現不外如是，佢就會馬上向我道歉，我當時見佢咁有誠意，於是咪同佢一齊囉！點知後嚟至發現，佢每日都會犯錯，多則十幾廿次，少則六、七次，每次事後佢都會道歉，聽得多都冇晒反應，所以有時一知道佢想道歉，我會拒絕佢，叫佢想想辦法先解決事情好過。好似有次帶我去愛情酒店玩，去到竟貨不對辦，佢猛向我道歉，但就冇要求酒店換房或者索性退房，真係畀佢激死！」

搵人幫手

仲有乜嘢問題會發生呢？小羽話：「剛才講嘅，係佢自己知道錯，至會向你道歉，但如果佢唔知道自己錯，佢係永遠唔會道歉嘅，就算女朋友親口同佢講『你錯啦！』如果佢覺得自己冇錯，佢都係唔會道歉嘅！如果遇上咁嘅情況，我有辦法對付到佢，首先同佢冷戰幾日，之後就Call佢啲老友，當然係要撐你嘅，講個古仔佢聽，重點係講出男友錯處，佢嘅朋友就會打電話扮同佢聊天，當一傾到同我冷戰，佢朋友就會乘機教訓佢，只要係佢啲豬朋狗友講嘅，佢都會接受，而當佢知道自己錯咗，唔使一分鐘就會打電話嚟向你道歉，可以話萬試萬靈！所以如果你男朋友係白羊座嘅，做錯咗事想佢哋道歉，自己講到口水乾晒都冇用，但用我呢招，就一定保證見效，不妨試試呀！」

白羊座3/21-4/19

白羊座特質：經常出錯

白羊座嘅男士性格最衝動，所以自小就經常出錯，每當發現自己做錯事情，佢哋會慣性地同對方道歉，但道歉得多，你就會覺得佢哋毫無誠意，而且道歉不久，又會繼續闖禍，所以做佢哋女友，要有做人阿媽嘅器量，否則煩呀！

白羊座下周性愛運程

狩獵運：3★

甜蜜運：3.5★

戰鬥運：3★

小羽Profile　　

年齡：22歲

三圍：35-24-35

撰文：小德

攝影：阿昌