男人除咗鍾意錢同權力之外，女人亦令好多男人迷失理智，甘願為其傾盡家財。之不過，為一個女人付出咁多，又會唔會得到回報呢？未必，所謂色字頭上一把刀。遇上壞女人固然會被騙感情，傷心欲絕，更加分分鐘連命都冇埋，好似經典情色電影《本能》中嘅女主角，就係呢種女人喇。
《本能》故事講述男主角力克（米高德格拉斯飾演）係三藩市警局嘅一位中年探員，由於佢在職期間犯過唔少錯，情緒經常唔穩定，兼且對未來產生迷惘，亦因為咁佢成日要睇心理醫生，呢位心理醫生貝思同時係力克嘅情人。某日，力克奉召去調查一樁離奇命案，死者係過氣嘅搖滾樂歌手，被人發現全身赤裸綁於床上，身上有多處傷痕，經證實係被冰插插死。力克得知死者死去之前，曾經同女友凱瑟琳（莎朗史東飾演），呢位又靚又有名氣嘅小說作家一齊，於是就先請凱瑟琳返警局查問。期間凱瑟琳表現出一臉自信同淡定，仲有意無意間露肉畀人睇。過程當中，凱瑟琳仲表示佢為咗寫作，所以經常勾搭唔同男人上床搵靈感，而同死者發生關係亦係為咗呢個目的。
經過一番查問，凱瑟琳被釋放。後來，凱瑟琳一本新小說推出，當中有情節描述一個女人用殺死搖滾樂歌手嘅方法殺人，令力克及一眾探員思疑，於是又再請凱瑟琳協助調查，今次仲出到測謊機添。凱瑟琳成功通過測試，但係直覺話畀力克知，凱瑟琳九成九係兇手，於是再行深入調查。期間，力克漸漸迷上呢個咁誘惑又咁索嘅女人，更甘於屈服其美色勾引之下，同凱瑟琳享受床上歡愉。當二人正進行激烈交鋒之際，凱瑟琳慢慢從床下拎出一支冰插……《本能》拍得充滿懸疑又有心理學元素，令故事充滿張力同深度，相當引人入勝，不過最吸引觀眾嘅地方，當然係索到啪啪聲嘅莎朗史東啦！當年佢美艷動人，全身都散發攝人魅力，而演出既投入又夠野性，一幕翹腳露出場面堪稱經典中嘅經典，令《本能》成為一代情色電影！
撰文：賢