渡海濠情:快閃藝墟 各取所需

近年興起玩「快閃」,最近澳門路環馬忌士前地,即係聖方濟各聖堂對開空地,每逢周六下午三點半至五點,就會有「快閃藝墟」嘅表演活動,任何奇人異士都可以嚟露兩手,而嚟自富城會嘅愛麗斯同埋小語,都話好想參加喎!

狠狠教訓

愛麗斯: 我最喜歡啲奇人異士,一見到佢哋就興奮,事關我好多男朋友都有特殊技能,好似第一個咁,佢就識得縮骨功,經常搵佢唔到!

小 語: 我就想去騷吓「哥利」,事關我從小就學咗好多奇技,但一直冇機會演出,家陣有呢個快閃藝墟,最啱我去露兩手,話唔定可以一炮而紅!

愛麗斯: 我想去睇吓有冇型仔帥哥,最緊要識啲奇技至得,咁第時拍拖都冇咁悶嘛!悶悶地就叫佢即時表演,咁我就可以隨時睇到精彩演出啦!

小 語: 同男朋友喺埋一齊,仲睇乜嘢表演,我嘅奇技就唔會喺佢面前演出,萬一佢話唔好睇,你話對我嘅打擊有幾嚴重呢?

愛麗斯: 你真係唔識得欣賞,我唔怕話畀你知,我每次睇完男朋友嘅表演都會特別興奮,好似有團火咁走勻全身上下,之後嘅反應仲會特別激烈。

小 語: 邊有人學你咁古怪,要睇表演至有反應,你咪畀我遇到啲咁嘅男朋友,有嘅話我一定會狠狠咁教訓佢,等佢戒除晒呢啲不良嘅生活習慣!

即興演出

愛麗斯: 你真係少見多怪,係人都想自己嘅男朋友多才多藝,佢喺你面前施展渾身解數,你話係咪會特別興奮先!

小 語: 又畀你講得啱,咁嚟緊嘅星期六就要早啲去,事關有魔術表演,聽講啲魔術師個個都好靚仔o架!

愛麗斯: 咁我一定要着性感啲去至得,因為萬一啲魔術師要搵女助手,我咁性感佢一定會揀我幫手,之後我就打蛇隨棍上。

小 語: 就算搵你做助手,都係幫吓手啫!之後人哋都唔認得你啦!咪發白日夢啦!而且佢哋大多數都會玩啲近鏡魔術,係唔需要性感女助手o架!

愛麗斯: 你理得我吖!玩近鏡魔術仲好,我當日着件超低胸嘅衫去,有理無理都烏低身,將完美身材展露出嚟,我就唔相信,佢個個都係唔食魚嘅貓!

小 語: 真係畀你激死!到時我哋一於兵分兩路,我有我去睇表演,如果睇得開心,話唔定會即時露兩手,而你就去識男仔,玩得開心嘅咪露吓對大包囉!

撰文:小德 攝影:阿昌