有婦之夫搭上有夫之婦嘅例子，唔單只喺電影橋段出現，現實當中亦有唔少，佢哋到底係本性貪玩貪過癮，定係真係為愛情喺埋一齊呢？佢哋一個背叛妻子，一個背叛老公去尋找真愛又係咪正確呢？問題好值得深思！點解我會思考呢個問題呢？因為剛剛欣賞完一套經典情慾韓片：《挑情寶鑑》！
《挑》片主角係一名玩世不恭嘅富家子弟趙元（韓國超級型男裴勇俊飾演），佢有學識又風流，令身邊嘅女仔個個都對佢甚為傾慕，但佢亦係一個賤男，最鍾意就係勾引女人上床，終日沉迷於色慾當中。同一時間，同趙元素有曖昧嘅堂姊趙夫人，亦係一名表面正經，但係骨子裏鍾意玩男人嘅蕩婦。眼見老公就快納妾，希望趙元幫手喺佢哋未完婚之前，將妾侍嘅童貞奪走，事成之後就會獻身作回報。不過，趙元卻志不在此，因為佢睇中由全度妍飾演嘅淑夫人。淑夫人早年喪夫，因為堅守貞節，得過貞節牌坊。為咗得到淑夫人，趙元不惜出動埋英雄救美絕招，終於成功同淑夫人翻雲覆雨，更發現大家之間有真愛存在。呢個時候，淑夫人嘅細佬就睇唔過眼，將趙元殺死，搞到淑夫人最後殉情自殺。
型男裴勇俊飾演又賤又鹹濕嘅趙元居然入型入格，的確令人意外，而扮演趙夫人嘅李美淑雖然已屆中年，但係風韻猶存，多場裸露戲中展露出姣好身段，以偏向癡女系嘅風格演出情慾戲亦令人耳目一新。至於全度妍副偈就普普通通，但係畀趙元百般勾引，到最後慾火被引爆嘅時候，令男人感受到將冰山劈開嘅成功感，往後嘅情慾戲就更加感受深刻，正！
撰文：賢