專欄輪住嚟：鄭禮騫搏殺兄弟拍住上

由於要寫專欄，所以每日都會掃吓Facebook，睇吓球圈新知舊友近況，或者有咩得意嘢做題材。咁啱畀我睇到啱啱做咗老竇冇耐嘅Michael出咗個Post，同佢合照嘅人熟口熟面，睇真啲，原來係今季效力理文嘅門將李瀚灝（下圖中）嚟。睇埋內文，佢哋唔係去踢波，而係去送保單，一於打畀佢傾吓先！

轉任理財策劃顧問

「喂，邊位？」「我係你結婚冇請我飲嗰個『大頭』呀！」「『大頭』唔好玩我啦，唔好嬲啦！打畀我有咩事呀？」「嬲都要寫稿！乜『阿灝』依家同你一齊做『理財策劃顧問』咩？」「係呀！佢上年9月已經考咗啲牌，不過因為球季踢緊，佢一路未開始做。呢排疫情球季停咗，佢咪趁機開始試吓做囉。做落佢都覺得啱自己做，我哋依家成日一齊出動，一齊喺公司上堂，好似以前一齊返中學嗰陣咁。」聽Michael講，唔止佢同「阿灝」係中學同學，連佢嘅阿頭「Kolay」都係新界鄉議局大埔區中學嘅學生，依家合作有晒默契。

依家Michael變咗人哋嘅老公同老竇，做嘢就要醒目啲、謹慎啲啦！「依家好努力咁去做嘢，希望畀到屋企人好啲嘅生活。雖然唔係做咗好耐，但都有啲成績！」Michael仲好認真咁話，好彩佢之前對啲隊友算係咁，喺佢做咗「理財策劃顧問」之後，「阿輝」（葉鴻輝）、「陳7」（陳肇麒）同「傻邦」（梁振邦）都用行動撐佢，所以佢會好畀心機去做，唔會要班兄弟失望！好啦，見你咁生性唔再嬲你，記得第時再擺酒（生第二個嘅滿月酒）請番我喇喎！

大頭