菁英盃打孖嚟
菁英盃今日連環爆，頭場深水埗運動場上演B組賽事，由凱景火併傑志；尾場A組東方龍獅與和富大埔於青衣運動場碰頭。4隊當中除凱景外，其餘3隊均需應付下周的高級組銀牌4強，或令兩場激戰充滿變數！
東方龍獅激鍊和富大埔
剛於聯賽被香港飛馬打破不敗身的東方龍獅，主教練陳婉婷表示︰「上場波尾段先輸，點都影響士氣，但我哋需要向前看。依家輸波尚算嚟得早，可以畀教練團去檢討。」除荷西安祖外，另一中堅井川祐輔亦養傷，「牛丸」稱下周要與傑志爭銀牌決賽席位，今仗用人需作出平衡︰「有啲嘢要避重就輕，例如要提升一啲球員狀態，要將一啲有疲態或者受傷嘅球員，留番喺4強場波時用，但同時唔可以喺今場比賽失去信心。 」
堅Sir望搵到平衡空間
在聖誕節正日於銀牌4強遇上富力R&F的和富大埔，主教練李志堅坦言下半季要應付亞協盃戰線，希望球員能找到應付不同賽事的最佳方案：「球隊上場贏理文攞咗3分後，有多啲嘢都可以穩定啲。最重要搵到平衡嘅空間。一年有咁多比賽，會唔會用同一方法去應付？逼得球員太緊可能大家都辛苦，特別係嚟緊要踢亞協盃，會有兩周係踢3場比賽，所以要搵機會畀較少上陣嘅球員落場。」外援杜度及哈利均有傷在身，「堅Sir」謂要有待觀察才決定能否披甲。（周日下午5時30分開賽）
凱景撼傑志變陣鬥搶W
凱景上周喜獲港超聯第1分，惟除南韓中堅金東進約滿離隊外，陣中亦有不少傷兵，包括徐相民、杜瑋鴻、黃洛及陸平中等，另外保羅及安基斯等借將因借用條例而未能披甲。主教練馮凱文透露今仗會作出較大變動︰「今場會好似上場菁英盃對飛馬咁，安排個別年輕球員上陣。隊中嘅年輕球員都知道要喺訓練時說服到我，就要落力去爭取上陣機會。希望佢哋以更好嘅心態應付今場波，證明自己有力立足。」
藍鳥傷兵問題紓緩
傑志今仗亦要變陣出擊，因守衞李毅凱累積5面黃牌停賽，剛傷愈的金奉珍或要填補其位置，主教練朱志光表示，經過兩周休戰期後，傷兵問題得以紓緩，養傷多時的中堅艾里奧亦有望復出，只是現仍有待觀察再作出最好安排︰「球隊上場贏飛馬發揮得唔錯，但又隔咗咁耐較難去保持到高水平。對手今場可能會死守，球隊需要耐性，隊中年輕球員亦要證明能力。」（周日下午2時30分開賽）
何彥霆報道