韋特劈炮震驚球圈
香港足總昨午公布，帶領香港隊在東亞錦第二圈壓過北韓，取得明年決賽周資格的主帥「白咖喱」韋特，經已向足總呈辭，並加盟一間日本球會擔任主教練一職。韋特上任僅3個月便離任，令不少球圈中人都感到驚訝。
儘管在一片爭議聲中上任，曾執教關島和中華台北等代表隊的韋特，旋即獲得球迷和球圈人士支持。港隊在頭兩場熱身賽，主場以0比1不敵泰國，以及作客1比1賽和印尼後，韋特在選人和排陣方面都曾受到質疑，但他「一於少理」以自己的一套行事，最終再一次在其「福地」台灣揚威，帶領港隊奪得久違的東亞錦決賽周席位。在取得東亞錦決賽周入場券後，韋特曾透露已有一連串大計，包括約戰歐洲球隊、培育新人等等。
郭嘉諾：招聘時間長影響大計
上周六的「中銀人壽香港超級聯賽」仍有入場的韋特，其離任消息傳出後，普遍球圈中人都感到驚訝，並對港隊能否短期內覓得繼任人感到擔心。對於韋特辭職一事，港隊助教郭嘉諾大感愕然：「我前一日先同佢開完會，冇諗過轉個頭第二日就係咁，據我所知，佢係有試用期嘅，可能呢個係可以咁快走到嘅原因之一。」
「郭Sir」雖理解韋特決定，但同時擔心香港隊未來：「教練人望高處都明白嘅，但對香港嚟講，本來有個方向，開個頭開得唔錯，2019年嘅計劃大家都傾咗好多，例如省港盃、U23外圍賽、友賽、東亞錦決賽周等等。所有嘢都有計劃，但依家主教練辭職，都會擔心短時間請唔到下一任主教練，因為招聘時間都搞好耐，對我哋影響都大。」
「郭Sir」期盼球迷不要感到絕望：「我哋都唔想外間覺得香港足球好似好兒戲，轉頭又有好多嘢轉咁，希望香港球迷唔好因為一啲個別事件而覺得冇希望，我哋都會有Plan。球員如果獲得徵召，我相信佢哋都會為香港隊努力，依家我希望盡快搵到下一個教練，繼續實行我哋之前嘅計劃。」