東方龍獅和富大埔大球場惡鬥
今日「中銀人壽香港超級聯賽」尾場爆發大戰，聯賽不敗之師東方龍獅在主場香港大球場迎來上季聯賽亞軍和富大埔的挑戰。東方是目前聯賽失球最少一隊，防守固若金湯，暫以兩分落後榜首富力R&F，但卻少賽兩場，勢必傾力擸3分重奪榜首之位；大埔前線擁多支銳矛，亦想贏波改善排名，激戰當前球迷豈容錯過！（on.cc東網周日下午5時30分直播）
東方龍獅今季走勢不俗，各項賽事未嘗一敗，今日面對上季「2哥」和富大埔，對手雖有後防大將艾華度停賽，惟主教練陳婉婷坦承優勢不大：「對手少咗艾華度點計都係好事，但佢哋兵源充足，杜度大可退後一格打中堅。但我相信佢哋會『擺大個頭』，哈利、勞高及伊高沙托尼一齊用，所以我哋喺防守一對一、同應付高空波方面都要小心啲。」
牛丸讚菁英盃收練兵之效
東方龍獅於上場賽和富力R&F的菁英盃，派遣多位今季較少上陣的球員出場，「牛丸」大讚他們表現為日後調兵遣將提供更多選擇：「一班少上陣嘅球員由開季到依家表現同態度都好好，上場終於畀到機會佢哋，而佢哋亦把握到。我覺得佢哋證明自己有能力之餘，亦話到畀球會知有唔同嘅選擇。」
艾華度停賽堅Sir望減輕影響
大埔主教練李志堅表示，球隊下半季要應付亞協戰線下，上仗出戰菁英盃的分組賽賽制，讓球隊多了試陣及輪換空間︰「嚟緊要踢亞協嘅時候，會連續兩個禮拜1周3賽，當中包括菁英盃賽事，到時要有取捨。」對於今仗有中堅艾華度停賽，「堅Sir」則希望不會對防守構成太大問題︰「作為防守主力，佢停賽對隊波實有影響，好在東方喺高波方面壓力唔算太多。其實今個星期都有好幾支前列球隊互撼，相信踢完今輪賽事後，聯賽形勢會更加明朗，所以大家都會好認真對待今場波。」
文：陳焌鏗、何彥霆