楊正光執意堅持

「上山」學法續續吓13年

在1993年由體院出道投身港甲，楊正光「光仔」的人氣並不及同期的蔣世豪和韋君龍，當時加盟的傑志亦只是中型班。儘管成為「甲組腳」以來際遇平平，但在1995年仍然得到大部分年輕球員夢寐以求的機會，「上山」投效南華。效力「少林寺」的13年間，除了外借到東方的兩個球季，有比較多的上陣時間外，其餘時間雖未至「坐多過踢」，但始終未能成為球隊一線主力。「嗰段日子好奇怪，機會係少但又唔係完全冇得踢，以為約滿就唔要我咩？球會又會同我續約，續兩年、續三年，續吓續吓咁就過咗30歲。」「光仔」回憶道。

曾經迷失搭路做餐飲

到了2008年，30有2的「光仔」終於要面對職業球員生涯首次「被轉會」，亦令他第一次為前途感到困惑。「都唔算『被轉會』嘅，只係會方覺得我喺南華唔會再有太多機會，不如去天水圍飛馬邊踢邊學做教練，都係為我退役之後打算。不過嗰時我唔係好諗得通，加上人工又減咗成半，諗住索性唔踢唔教轉行去做餐飲，搭晒路啦！但最後我都冇去到，因為我好清楚自己淨係識足球，於是決定全力向教練呢條路發展。」

富力R&F（左）今季開季醒，楊正光功不可沒。	陳曉明（右）向「光Sir」提供不少寶貴意見。	與愛妻Carol、囡囡Kaily和囝囝Cavan，一家四口幸福滿瀉！

立定決心的「光仔」，在2009年開始踏上教練之路，出任天水圍飛馬助教，2010年在時任香港隊教練曾偉忠引薦下，「光仔」成為港隊及奧運隊的助教之一。直至2013年「再上山」擔任助教，其後轉任香港U16教練成功帶領球隊取得亞少盃決賽周席位，到翌年初「再再上山」，並於同年3月接掌南華帥印。一直順風順水的「光帥」，在2014年12月15日晚上9時30分，收到南華新領導層的電話通知：「你聽日唔使返工喇！」

「轉做教練？我揀啱咗！」

「過去咗唔好提，笑吓算數！好彩仲有識得欣賞我嘅人，我只係失業咗2星期左右，東方就請咗我做助教，跟住一季仲接高尼路棒做主教練。嗰陣我終於肯定，自己做教練嘅際遇比做球員好好多，好彩當初冇轉行咋。」2015年12月13日離開東方，北上加入中甲梅州客家接受挑戰的楊正光笑說。

「冇伯樂冇今日嘅我」

楊正光之後在2017年4月回流到香港飛馬，直到上季後再次離隊加盟富力R&F，展開教練生涯新一頁。「睇番轉頭，我好感激過去每一位畀過機會我嘅老闆，同提攜過我嘅所有人。特別係『積Sir』（曾偉忠），係佢畀機會我加入足總，幫我開路！當然仲有好多教練都有過料畀我，好似郭家明、陳曉明、金判坤、同奇雲邦特等等，無佢哋嘅教導同支持，就算我自己一個人幾堅持，都唔會有今日嘅楊正光。」

為生活！辛酸環港遊都捱過

之前記者Iris在《新力睥》中提到，盧均宜每周怎樣往返香港與廣州，身為主教練的「光仔」也差不多。許多人覺得就算交通怎樣方便，為工作北上南下都是一件非常頻撲的事。

青衣→蒲崗村→天水圍→荃灣

「睇你點睇啦！依家比起當年往返梅州已經輕鬆、快捷得多。何況講到頻撲，點都唔會頻撲得過當年。」「光仔」透露其一段辛酸史：「當年去天水圍飛馬人工少咗成半，為咗生活，我幾乎每周有三、四日環港遊，如果嗰日飛馬唔使晨操，下午5點半完成操練後，我會搭巴士由青衣去蒲崗村跟港青嘅操練，由6點到8點半，之後搭巴士入天水圍教乙組嘅元朗，我係球員兼教練嚟，9點半操到11點，再搭巴士返當時嘅荃灣屋企，成個人散晒！但唔係咁幫補收入生活唔到。可能嗰陣慣咗，依家一啲都唔覺得頻撲。」

文：大頭 / 攝：戴陶蔚、何彥霆