曾梓軒封積Sir做偶像
港超新軍凱景以培訓年輕球員為旗號，不少球員更來自拔萃男書院，其中一位便是前港隊名將兼教練、現任香港足球總會五人足球經理曾偉忠之子——曾梓軒。「梓軒」坦言過去在學界留下不少遺憾，期望在職業路上彌補：「中四斷手、中六整親膝蓋，嗰兩年都錯過好多關鍵比賽，所以我希望投身職業足球後，有機會踢番一啲重要賽事！」
從小背負「積Sir（曾偉忠）個仔」之名四出征戰，「梓軒」指未有因而有壓力，爸爸更是他追夢的最強後盾：「雖然佢唔係成日睇到我比賽，但係我都會問佢點樣去解決一啲足球問題，尤其今季我要熟習一個新位置——防守中場，以前我踢邊路比較多，所以遇上難題可以搵佢指點迷津。我有時會跟佢踢五人賽，佢都會同我講有乜需要改善。」
轉型防中有父親指點迷津
面對轉型，球員時代踢防中的父親當然是最好的「教科書」：「最需要改善嘅嘢我相信係用波嘅時候，呢個位置最大嘅難題就係360度都有人，以前踢邊路背後冇人，依家當後衞攞波嘅時候，我去幫波嘅位置、點樣去轉身攞波，都仲係有啲問題要迅速改善，因為我會有好長時間踢呢個位置，所以有時練波做得唔好，除咗教練幫手之外，仲可以返屋企問老竇應該點樣做。」
爸爸不單是後盾、教科書，還是偶像：「爸爸話自己係一個好勤力嘅球員，我亦聽過人講佢係『操極都仲有』，同我就有少少分別，因為我體能比較差，仲追緊！佢依家其實都好忙碌，做嘢做到冇停手，我相信佢踢波都係呢一類球員。」
青年軍先後踢過北區、南華、東方的「梓軒」，同期隊友比自己早在職業足球路上起步，更有幸參與省港盃、亞運等賽事。眼見昔日戰友平步青雲，「梓軒」雖羨慕，但他亦決心追趕：「同我同齡嘅球員好多都已經喺呢條路平穩發展，好似謝朗軒、黃駿軒，余沛康等等，我依家先開始捉住呢個機會，去行佢哋好早已經行過嘅路，佢哋嘅經驗已經比我豐富幾年，我要再加倍努力去追。」
獲陸平中點化修讀教育
現時為香港教育大學體育教育榮譽學士4年級學生的「梓軒」，早前已考獲香港足球總會D級教練和亞洲足協五人足球教練（級別一）資格。然而，誰會料到他選擇修讀教育的原因，是因為隊友陸平中呢？「嗰陣我文憑試成績唔係咁好，陸平中就打電話畀我，叫我去教育大學嘅副學士面試，始終讀體育我比較有興趣，所以最後都選擇入教育大學。之後讀完副學士就成功駁上去學士學位，呢幾年都培養到我做老師嘅興趣。」「梓軒」說。
作為老師，要懂得各項運動的玩法、規則，而電競作為新興運動，當中不乏足球相關遊戲，另一身份為足球員的「梓軒」盼新一代能重拾足球樂趣：「依家下一代都好多打機嘅時間，不如落場感受下同人溝通嗰種感覺，好過你一個人專注喺部機度。」
曾梓軒小檔案
出生日期：1995年10月27日
身高：1米75
體重：65公斤
位置：防守中場、後衞
現效力球隊：凱景
球衣號碼：27
文︰陳焌鏗
圖︰何彥霆(部分由受訪者提供)