南韓模特兒畀人嘅感覺，不外乎美艷同性感，而能夠喺芸芸模特兒之中脫穎而出，除咗兼備上述兩個優點外，仲具有非凡嘅氣質，好似李真英就係憑住陽光魅力取勝。
模特兒呢一行講青春，如果想打響名堂，最重要就係贏喺年齡呢個起跑線上，愈年輕入行就愈有利。對於李真英嚟講，如果按呢個標準嘅話，理論上佢已經輸足九條街，皆因佢25歲才投身模特兒行列，不過佢由新人攀升到超人氣模特兒，只係用咗一年時間，點解佢冒起得咁快呢？迷人嘅樣貌及前凸後趷嘅火辣身材固然係成功嘅必要條件，此外佢散發出一股陽光氣質，無時無刻發放正能量，予人親切感，因而深受歡迎。
真英之所以擁有呢個特質，係同佢嘅成長及工作經歷有關，原來佢自細嘅夢想係成為一位時裝設計師，讀大學時喺一間時裝設計公司做實習生，大學畢業後就全職做時裝設計師。雖然完成兒時嘅夢想，但係佢卻發現現實中嘅工作同佢所想像嘅唔同；因為工作關係，接觸到唔少模特兒，慢慢對呢行產生興趣，咁啱有模特兒事務所問佢有冇興趣試吓，就係咁佢便投身模特兒行業。雖然外形有齊晒條件，但經驗係零，故此佢最初由攝影模特兒做起，雖然收入比以前少咗好多，卻從中得到唔少樂趣，最重要係感覺更加自由。
憑住美艷嘅外形及陽光嘅氣質，真英好快打響名堂，模特兒事務所便安排佢喺釜山舉辦嘅國際車展擔任車模，而呢次演出絕對係事業嘅轉捩點。首次喺大型活動上登場嘅佢，表現得相當淡定，展現出陽光美，而呢種有別於一般模特兒嘅正能量，令佢成為全場嘅焦點、攝影師爭拍嘅對象。
成為人氣車模之後，令真英最為感動嘅並非事業起飛，而係得到父母嘅支持，有一次父母更拎咗紮花去到車展現場送畀佢，令佢大為感動，同時亦令佢增加信心。之後，真英喺世界一級方程式錦標賽上登場，呢次化身成超性感賽車女郎，不但盡現美腿魔力，胸前深溝更係令人眼前一亮，從此奠定一線賽車女郎嘅地位。
事業攀上高峰，工作亦排得密密麻麻，雖然工作壓力大，不過真英並冇出現健康問題，原來佢一直堅持嚴格嘅自我管理，每日都會做健身同游水，務求令自己保持最佳狀態。正因為呢種態度，真英先至可以無時無刻喺展台同賽道上散發出迷人嘅正能量。
簡介：李真英唔單止擁有迷人嘅樣貌，激凸嘅上圍更係成為焦點，除咗做運動Keep Fit，佢話最重要係注意飲食，否則保持得雙峰堅挺，卻會換嚟水桶腰，所以絕對唔可以偷懶。如果大家想了解真英多啲，就要Click入呢個網站。
網址：http://cafe.daum.net/jinyoungYi
出生地：首爾
身高：173cm
三圍：35-24-36
撰文：魂