握手哥梁子駿：咪咁易自滿

「功咩臣呀！只係交咗個靚助攻，同射入球12碼之嘛，普通料嚟啫！」面對熟人總會「吹水唔抹嘴」的「子駿」笑謂。「我講笑咋！我都好開心可以有貢獻，季前我講過過嚟夢想FC係要證明自己仲踢得，可以幫到『細榮』（即夢想FC主教練梁志榮）同『阿駒』（即夢想FC CEO梁智駒），幫到球隊同時令隊中嘅年輕球員成長。」

講到要令年輕球員成長，梁子駿就最適合不過。「知你講咩啦！希望佢哋千祈唔好學我當年咁……。」17歲便在南華打出名堂，就算當時「少林寺」陣中球星如雲，依然不乏正選上陣機會、榮膺南華最佳年青球員、入選奧運隊、獲香港隊徵召出戰亞洲盃外圍賽等等，可謂平步青雲。「可能一切嚟得太快、太順利，嗰一刻我以為自己好掂，亦即係依家啲人成日講『個頭大咗』，球場內外都不可一世，當時都有球圈前輩出心提我，但講幾多我都聽唔入耳。」「子駿」收起笑臉感慨地道。

「心態正面肯聽意見」

之後的17年間，梁子駿在足球路上經歷過大起大落，被踢走、轉會、外借、球會散班、斷腳、退居大後備等等。回望過去，今日已躋身老將行列的「握手哥」，希望可以將自身經歷與夢想FC的後輩分享，他說：「依家好多隊友都好後生，好似謝家榮、林衍廷、林樂勤、朱偉鈞同黎厚希咁，都係好有潛質嘅，但希望佢哋唔好咁易自滿，保持正面嘅心態，要去進步、聽人哋嘅意見，保持職業足球員應有嘅態度，如果唔係，好快就會畀個圈淘汰。」

梁子駿Profile

出生日期：1985年5月19日

身高：1米73 位置：右中場

球衣號碼：7

圖：何彥霆 文：戴陶蔚