中國球壇經常爆出假波傳聞，最近前英超球星安尼捷比爆料，佢加盟中甲球隊北京北控後，曾經2次被教練要求「唔好咁落力」比賽，懷疑球隊打假波，向球會反映唔單止冇被理會，之後更被球會打入冷宮，呢位尼日利亞國腳透露已向國際足協作出投訴。
愛華頓青訓出身、先後效力過愛華頓、西布朗同新特蘭嘅安尼捷比，喺英超打滾超過10年，直到上年夏天登陸中甲加盟北京北控，不過同年10月就同球會鬧翻，並且一直被雪藏，到今年2月更提前解約。
英國《每日郵報》爆料，安尼捷比投訴喺北控收到疑似「假波指示」，佢曾經2次被教練要求喺比賽中「not to try（唔好咁落力）」，其中1次發生喺對北京人和嘅「打吡戰」前，當安尼捷比向隊友講呢件事，隊友竟然話：「呢度係中國，我哋要聽指示！」
安尼捷比之後委託曼徹斯特嘅體育律師Chris Farnell向球會反映，不過2次行動都冇任何回音，反而搞到自己被放入雪櫃。雖然依家佢同北控已經「分手」，不過《每日郵報》聲稱安尼捷比已經向國際足協投訴，希望佢哋會進行調查。