再鋒利的刀也有生銹的一日，同樣任何運動員都有退下來的一天，明年「5‧19」便34歲的「握手哥」也不例外，已開始為退役後的生活打算。
「雖然我一直都對自己嘅體能好有信心，但職業足球唔係玩，唔係話我話自己得就得，都要面對現實嘅。但我太鍾意足球喇，我想退役之後可以繼續留喺球圈工作，教練係其中一個選擇。不過我依家只有『D牌』，想做教練就要快啲的起心肝進修先得！」效力冠忠南區期間，「子駿」曾經到學校參與校隊的訓練工作，自言十分適合朝教練方向發展。
那麼家族的海鮮生意呢？「我講過啦！我好細個已經同咗阿爸阿媽講唔會接手，唔係因為我有冇能力，而係我淨係鍾意踢波，對做生意一啲興趣都冇。當我見到呢兩位好辛苦咁工作養大我哋三兄妹嘅老人家，頭上嘅白頭髮愈來愈多，我都會提醒自己點都要負番啲『大仔』嘅責任，但因為我細佬『子成』幫阿爸阿媽手做得好好，我都無謂阻頭阻勢，不過只要佢哋出聲，我一定唔會再好似以前咁，耍手兼擰頭。」