港足一條心豪派寶島4蛋

港隊上半場取得一面倒優勢，開賽僅9分鐘內，便先後憑陳俊樂及佐迪近門頭槌及單刀各省一粒，領先2比0。之後兩軍陷於拉鋸局面，但港隊沉着應戰，38分鐘及42分鐘再由「樂仔」同佐迪輪流建功，港隊半場已遙遙領先4比0。

換邊後港足攻勢放緩，但中華台北破關乏術。之後港隊先後收起林嘉緯、佐迪同列斯奧，給予新人上陣機會。戰至70分鐘，陳俊樂接應角球近門倒掛最似樣，可惜僅僅高出。之後後備登場的姚浩明勁射罰球，僅被對方門將擋出。中華台北完場前2分鐘有趙明修兩黃變一紅被逐，港隊最終贏4比0。由於昨晚巴勒斯坦爆冷以2比1擊敗主辦國印尼，港隊目前仍居小組次席，未來兩仗對巴勒斯坦、印尼非常關鍵。

郭嘉諾：鬥巴勒斯坦起碼1分

港足主帥郭嘉諾賽後表示：「今場將樂仔擺前一格，喺前場做更多進攻；嘉緯出場對用波有幫助，其他球員有信心，畀波又更有目標，帶動全隊走動。」郭Sir亦透露林嘉緯事前因水土不服致腸胃不適，但因今場「一定要袋3分」而續派這位經驗老到的球員上陣。郭Sir並希望餘下兩仗取得分數：「巴勒斯坦1對1技術好好，要出線的話，計過數肯定起碼要多1分！最後一仗對印尼壓力相當大，因此下仗要率先搶分，相信球員可一場比一場進步。」

由初時抽得「上籤」到最後增至5隊同組，港足走到兩連勝的一步並不容易，前鋒鍾偉強表示：「成班一齊踢，齊上齊落大家鼓勵，唔會埋怨同畀負能量。每個人跑多步，成隊氣氛好好多，陣中3位老大哥場內場外都指點，無分你我，大家一條心，是球隊最大的原動力。」