北漂失意回流投香港飛馬 鐵漢基藍馬I'll be back！
藉世界盃外圍賽的出色表現，加上當時香港球員在內地聯賽仍被當作內援，港隊不少成員於2年前展開「北漂」生涯，不過未必每位都如「法叔」法圖斯有過一段美好回憶，緊抱信念捱過「零上陣」日子後，前港足後衞基藍馬最終回流香港，加盟香港飛馬，把握餘下3個月時間作最後探戈：「我原本已經生活無憂，但唔甘心足球生涯以低潮作結，希望再獲北上機會，到時對全世界講：『基藍馬返嚟喇！』」
32歲的前港隊中堅基藍馬效力天津權健近兩季，除加盟初期曾獲重用外，當球隊換上前世界足球先生簡拿華路執教後被投閒置散，亦因傷患問題及競爭，於球隊衝「超」後缺乏上陣機會，終在約滿後於2月回流港超聯加盟香港飛馬。即使發展不似預期，但基藍馬仍沒有後悔踏上中國之旅：「我好開心有呢段經歷，令我對足球了解更多，尤其是簡拿華路身為世界級後衞，喺防守同訓練上都令我有唔同嘅領悟。最難忘係贏中甲冠軍升上中超，呢種感覺我從未感受過，一切都好正。」
不受「大簡」重用中超零上陣
未能成為「大簡」球隊計劃中的一員，基藍馬坦言曾有轉會念頭，不過由於不再被視作內援，令他在內地無容身之地，只好苦等約滿，這段時期令他堅持下來的，是信念：「如果有機會，加盟中甲我都願意，始終冇人想成季都只踢預備組。我接受現實留低，相信那怕機會只得一次，都要好好把握。亦感激隊友經常勉勵我，雖然最終機會冇出現，但我終於捱過咗。」
「唔甘心低潮時離開足球」
有報道指基藍馬在權健月薪超過30萬港元，兩年間薪金早已令他生活無憂，雖然只與飛馬簽約至季尾，不過基藍馬決心於餘下3個月在港重上高峰：「除為球隊而戰，仲為自己打拚，令球迷再次留意我，呢3個月係我最後機會，唔可以畀佢流失。我原本可以退役，但我唔甘心喺低潮時結束足球生涯，所以希望喺香港展示自己，再重返中國球壇，同大家講基藍馬返嚟喇！」
慶祝衝「超」時仍不忘高舉區旗心繫香港，世盃外圍賽客戰逼和中國一役仍歷歷在目，不過基藍馬近期未有入選港隊名單，最近一次代表香港已是去年9月作客馬來西亞的亞洲盃外圍賽：「11年喇，有香港先有今日嘅基藍馬，港隊改變咗我嘅足球事業，甚至生命。年齡唔係障礙，冇嘢係冇可能，我期待再次披上港隊戰衣嘅一刻。」
基藍馬Profile
全名：Jean Jacques Kilama
出生日期：1985年10月13日
出生地點：喀麥隆 身高：1米85
體重：80公斤 位置：中堅
曾效力球隊：流浪、晨曦、
東方、天津權健
現效力球隊：香港飛馬
球衣號碼：5
圖/文：袁志浩