若然用魅力過人嚟形容一個囡囡嘅話，相信每位男士心中都會湧起一個形象，雖然大家所諗到嘅形象未必相同，但可以肯定有幾個要素必然一樣，就係眼大兼輪廓分明，同時擁有前凸後趷嘅魔鬼身材。嚟自南韓嘅模特兒尹善熙，不但有齊晒上述條件，而佢嘅百變形象，更係令人一見傾心。
作為一位人氣模特兒，迷人嘅樣貌固然唔少得，而火辣身材同樣要有，但係想獲得眾人支持，更需要親和力至得。而講到親和力，相信冇一位模特兒及得上尹善熙。喺讀書時期，尹善熙已經係一個樣貌甜美嘅索女，而佢嘅夢想係做幼兒園教師，事關出生於大家庭嘅佢，自細對照顧小朋友有相當嘅心得，同時亦深受小朋友歡迎，因此佢希望長大之後，能夠繼續做照顧小朋友嘅工作。不過夢想同現實始終係會唔同，事緣佢讀大學時，幫朋友客串做時裝模特兒，擁有迷人面孔同修長美腿嘅佢，對於呢次仗義幫忙相當有信心，卻估唔到竟然獲得模特兒公司嘅垂青，問佢有冇興趣做兼職攝影模特兒，當時只得20歲嘅善熙，覺得凡事總要嘗試一下，先至可以擴闊自己嘅視野，於是便答應對方。
對自己外形相當有信心嘅善熙，以為可以喺短時間內獲得人氣，卻估唔到經常被攝影師批評做得唔好，呢個時候佢先至知道模特兒工作原來唔係咁簡單。為咗可以提升自己嘅實力，佢唔單止虛心請教前輩，同時接受模特兒事務所嘅訓練，經過兩個月嘅特訓後，佢嘅表現進步咗好多，更獲得相當好嘅評價。此時，佢覺得既然自己花過咁多工夫，無可能唔繼續發展落去，結果佢就選擇做全職模特兒。
之後，事務所安排佢以車模身份喺釜山舉辦嘅賽車展上登場，而化身成性感車模嘅佢，憑住玲瓏浮凸嘅身材成為展場上嘅焦點，同時表現淡定同優雅嘅氣質，獲得相當高嘅評價，處女演出咁成功，令佢對未來事業發展相當有信心。事務所為咗令佢嘅人氣更高，除咗安排佢喺各個大型車展上亮相外，亦安排佢為多本雜誌拍攝寫真，由於工作排得密密麻麻，因而令佢感到極大壓力，佢曾經諗過若然選擇做幼兒園教師，可能會冇咁辛苦。
及後佢參加超級賽車模特兒大賽，結果成功進入最後8強，雖然最終未能獲獎，但卻令佢嘅人氣推上高峰，而佢亦趁呢個機會踩入賽車女郎界，化身成性感賽車女郎嘅佢，不但將火辣身材完美展現，同時獲得極高嘅注目度，火速喺網上爆紅。自此之後，佢將工作集中喺車模及賽車女郎兩個範疇，主力喺大型賽事上登場，如此限制自己演出機會嘅原因，係希望可以得到更多休息時間，令自己每次演出都能保持最好嘅狀態，至今尹善熙係南韓首屈一指嘅模特兒。
出生地：首爾
身高：168cm
三圍：35-24-35
簡介：尹善熙嘅外形確實係無可挑剔，從激凸嘅上圍到修長嘅美腿，每個部位都散發出令男士心跳加速嘅威力，尤其係豐厚嘅嘴唇，簡直令男士為之心動，難怪唔少網民稱佢為擁有最迷人嘴唇嘅模特兒。如果大家想了解佢多啲，就要Click入呢個網站喇！
網址：http://cafe.daum.net/7pinksun
撰文：魂