李慧詩姊妹團衝東京奧運
「牛下女車神」李慧詩已成為本港單車界Icon，不過港隊踩短途的車手一向買少見少，場上孤軍作戰的Sarah亦曾多次提及，夢想港隊於2020年東京奧運可出戰團體爭先賽，與其他隊友並肩作戰。其實現時港隊陣中有兩位「短途新秀」李海恩及馬詠茹，未知大家對她們認識有多深呢？
李海恩3年車齡返港圓夢
現年27歲的李海恩（Jessica）於香港出生，不過自小就隨家人移民蘇格蘭，原本熱愛划艇的她3年前開始接觸單車，由於起步比人遲，在當地未獲全職訓練機會，因此她主動聯絡港隊，最終被總教練沈金康相中，自全運會後開始加入港隊。
忍痛離開居住了近16年的蘇格蘭，全因一個簡單的夢想，李海恩說：「我係為咗做全職單車運動員先返香港，呢個係我夢想，我甘願放棄工作、暫別未婚夫同愛犬。呢幾個月嘅全職生涯，我已經預咗會好辛苦，但都比預期更辛苦。訓練量及模式都比英國時強，不過如果你想成功，你唔會去搵藉口，咁先能夠克服到困難。」
自言最喜愛爭先及競輪賽的Jessica，享受當中的臨場應變及戰術多元化：「我嘅比賽經驗唔夠，狀態唔太穩定，有Sarah一齊練會好好多，進步會更加快，前提係你要識問問題！始終Sarah係世界級，如果每樣都學到就足夠。」即使「輸在起跑線」，不過Jessica無視年齡障礙，目標要於亞運爭取前5：「年紀唔係一個問題，香港有好多運動科學去幫我哋回復體能。長遠目標係東京奧運，不過亞運都要攞好成績，做到最好，我唔會為自己嘅單車生涯設下時限，有得踩幾耐，我就會踩幾耐！」
美少女馬詠茹弱點太溫和
李慧詩另一師妹、20歲的單車美少女馬詠茹（Vivian）去年已嶄露頭角，於亞洲場地單車賽女子團體競速賽及應屆亞室運團體爭先賽，先後孖住Sarah贏得銀牌及金牌。現正休學全情投入單車事業的Vivian，亦無懼炒車陰影，即使最近於世錦賽中兩次炒車，令身體刮損一大片，亦堅持重返賽場。心態及技術變得更成熟，但原來這位美少女亦有弱點：「亞錦賽時我狀態好好，但教練特登唔出我，原來佢話我份人溫和，性格好慢無咩反應，所以想刺激我，想我發脾氣踩好啲。」
「2018新鴻基地產香港國際場地盃」將於本月31日及4月1日在將軍澳單車館上演，Vivian希望藉主場之利爭取更多世界排名積分：「我要攞多啲分參加世界盃，因為對攞奧運積分好重要。世錦賽水平咁高，Sarah都攞到好成績，代表教練團嘅訓練計劃同系統有效用，所以有信心亞運可以交出表現，奧運方面就集中訓練團體項目，希望攞到入場券。」
李慧詩Sarah
年齡：30
項目：50米計時賽、爭先賽、 競輪賽、團體爭先賽
威水史：2012倫敦奧運競輪賽銅牌、2013世錦賽500米計時賽金牌、2014亞運爭先賽、競輪賽金牌、2018世錦賽競輪賽銀牌
馬詠茹Vivian
年齡：20歲
項目：爭先賽、 競輪賽、團體爭先賽
威水史：2017亞室運團體爭先賽金牌、競輪賽銅牌
李海恩Jessica
年齡：27
項目：爭先賽、 競輪賽、團體爭先賽
威水史：2018香港錦標賽爭先賽、競輪賽銀牌