東網直播好事成雙
「中銀人壽香港超級聯賽」今日安排兩場激戰上演，頭場由近4仗均錄得零失球的聯賽「三哥」和富大埔，於大埔運動場主場擺擂台，恭迎今季在聯賽未嘗一敗的「一哥」傑志。傑志主帥朱志光透露為備戰亞冠今仗決定收起科蘭，「藍綠對決」或會為榜首形勢帶來變數。尾場於元朗大球場上演「巴士打吡」，由踏入狗年齊響勝鼓的陽光元朗與冠忠南區對壘。東網將直播兩場賽事，球迷萬勿錯過！（東網on.cc周六下午2時30分起直播）
傑志焗變陣 和富大埔復仇騷
近4仗均冇失波的和富大埔，周中公布港隊中堅羅素以內援身份轉投中甲球隊遼寧宏運。對於羅素離隊他投，主教練李志堅認為機會難得，並感謝他今季為球隊作出的貢獻︰「始終佢都30歲，再有外流機會好難得。佢喺香港期間幫到球隊好多，我覺得佢係一個好球員，無論紀律同表現都好好，所以衷心祝福佢有好發展。」
「堅Sir」怕球員High過龍
對於羅素離隊後的空缺，「堅Sir」表示慶幸球隊先後有杜度及馮慶燁傷愈復出，同時期望今仗能夠一雪首循環遭對方反勝之恥︰「我哋上一次對壘，其實有機會攞分，領先半場去到六十幾分鐘先失守，仲要去到好後期先輸，球隊上下都覺得有啲唔抵。」「堅Sir」亦希望球員能夠冷靜應付今場賽事︰「球員對呢場波都好期待，不過希望佢哋可以控制到情緒，去打一場好波，唔好太過興奮！」
上場聯賽主場以3比1反勝R&F富力的傑志，隊長黃洋於賽事上半場因傷退下火線，經診斷後證實大腿後肌撕裂，將最少缺陣4周，前鋒佐迪又未傷愈，惟主教練朱志光表示，球隊仍有足夠人腳應付本地賽，更形容上仗換走黃洋後「錯有錯着」︰「上場整體上踢得唔係咁好，攻勢唔夠銳利，但喺黃洋傷咗之後，隊波進攻次數多咗。有時足球嘅嘢好難講，華杜斯同黃洋係穩陣，但進攻次數可能少咗，林恩許進攻意識強啲，令人哋受嘅壓力多咗。」
由於傑志明日早上便前往日本，準備應付周二亞冠盃分組賽作客對柏雷素爾的賽事，「朱Sir」透露今仗會收起陣中的烏拉圭球星科蘭︰「今場一定唔出科蘭，因為要畀佢休息，佢嚟咗之後都未停過，希望佢返去自己曾經落過班嘅地方，會有更好表現。」
齊齊撻番着陽光元朗鍊冠忠南區
雖然陽光元朗目前仍處於聯賽榜尾二位置，但隨着上周於主場以2比1擊敗榜末球隊標準流浪後，雙方距離已擴至8分，同時亦僅與排第4位的東方龍獅相差4分，在聯賽仍有望爭取更佳排名。
曾昭達目標擸3分
對於上仗完場前才憑着後備上陣的黎耀昌射入奠勝一球，陽光元朗主教練曾昭達坦言球隊贏得驚險︰「對流浪係贏得驚險啲，但起碼最終都贏波，減輕咗好多壓力。成場波有幾樣嘢值得高興，就係球隊喺主攻方面踢得唔錯，陳衍光、葉子俊同羅振庭等一班傷兵可以復出，其中雲迪奴域狀態好好，加上黎耀昌加盟後發揮到作用，希望球員踢得好啲，可以繼續贏落去。」
相隔3個多月後，冠忠南區上周重返主場作賽，憑着西班牙前鋒馬高斯一箭定江山，以1比0小勝夢想FC，終止球隊聯賽6場不勝走勢。主教練鄭兆聰（Ricky）上仗賽後對一眾球員投下信心一票，並希望球隊能夠繼續力爭佳績︰「球員咁多場冇贏過波，佢哋會緊張，但去到最後都可以『過關』。有時際遇唔係咁好，我同球員講過好多次，我哋係一支好球隊，足以喺港超競爭。希望喺新一年可以彈起，不過呢場係唔足夠，我哋要期望多啲佳績，希望呢場波畀到信心佢哋。」對於巴西新援伊利亞斯的表現，「Ricky Sir」認為他正是球隊所需要的前鋒，惟對方之前在馬來西亞落班並於去年11月收咧，因此要慢慢重拾比賽狀態，並會逐步讓他得到更多上陣時間。
本周賽程
中銀人壽香港超級聯賽
3月3日（六）
和富大埔 Vs 傑志
大埔運動場
下午2時30分
$80、$30（特惠票）
陽光元朗 Vs 冠忠南區
元朗大球場
下午5時30分
$60、$20（特惠票）
3月4日（日）
R&F富力 Vs 標準流浪
廣州燕子崗體育場
下午2時30分
$50
夢想FC Vs 東方龍獅
青衣運動場
下午5時30分
$60、$20（特惠票）